Daniel Birkeland ville fylla LPG på Tahoen sin, men pumpene på Os er stengt for godt. (Foto: Kjetil Vasby Bruarøy)

LPG-pumpa på Os er stengt for godt

– Verdas reinaste drivstoff har blitt vanskeleg å få tak i, seier Daniel Birkeland.

Av: Kjetil Vasby Bruarøy

I rundt ti år har bilar som går på LPG (liquefied petroleum gas) kunna fylla tanken på Best-stasjonen på Os.

– Bilen min var bygd om til LPG-drift då eg kjøpte den. Eg kan velja bensin, men med forbruk frå 1,2 til 1,7 liter per mil blir det dyrt, spesielt når bensinprisen er oppe i 16 kroner literen, seier Daniel Birkeland.

Daniel sin Chevrolet Tahoe har 290 hk, og bruker 20 % meir drivstoff når den går på LPG. Men lågare pris gjer at drivsoffutgiftene har vore som ein vanleg bensinbil. I alle fall når bensinprisane har vore høge.

Då han fredag skulle fylla tanken var pumpa stengt. Ein lapp på pumpa seier tydeleg i frå om at det er «slutt på LPG».

– For kostbart å tilfredsstilla nye krav

Familien Tveit skal, etter 39 år med drift av bensinstasjon i Os, leiga ut stasjonslokalet til YX/7-Eleven.

– Uavhengig av dette måtte vi ha investert i omfattande ombygging og kursing for å driva LPG-anlegget vidare. Det har kome nye, strengare krav, fortel Rolf Tveit.

Då tanken var tom før helga, var det siste skvett med flytande gass frå Best-stasjonen. No skal anlegget demonterast og fjernast.

– Salet har gått nedover dei siste åra. Det er ein del amerikanske bilar som går på LPG, og mange bilar bygd for den polske marknaden. Her hadde vi fleire kundar for 5-6 år sidan enn no, kanskje fordi mange polakkar reist heim, og dei som framleis bur her har kjøpt norske bilar.

Til no i år, på 2,5 månad, har dei selt tilsvarande mengde LPG som éin dagsomsetnad med bensin.

Auka avgift på verdas reinaste drivstoff

Saman med strengare krav og svakare marknad har prisane auka.

«Verdens reneste drivstoff vil ikke bli solgt i Norge» skreiv Hegnar.no då regjeringa i 2015 forslo innføring av vegbruksavgift for LPG.

Hegnar viste til ei pressemelding frå Flogas Norge AS, som srkeiv at dei rekna med at mange av landets 140 fyllestasjonar for LPG ville legga ned.

«Beslutningen om innføring av veibruksavgift på naturgass og LPG er tvunget igjennom i regjeringsforhandlingene av miljøpartiet Venstre godt hjulpet av lobbyvirksomhet fra Zero, til store protester fra alle høringsinstanser med kompetanse på gass og biogass», skreiv Flogas i pressemeldinga.

Seinare har avgifta auka. Frå 2018 til 2019 aukar avgifta, ifølgje regjeringen.no, frå 2,23 til 2,98 kroner per kilo.

– Eg jobbar sjølv i petroleumsbransjen, og ser at vi sel 50/50 med olje og gass. Utsleppet frå LPG er reint, bilen min kunne stått i stova og gått. Eg må seia eg undrast over denne politikken, seier Birkeland.

LPG er vekke frå stasjonane på Flesland og Nesttun. Nærmaste stasjonane no, så vidt han veit, er på Hylkje og på Voss.

– Det blir naturlegvis ikkje sånn at eg reiser der og fyller tanken. Eg får kjøra ei stund på bensin, og så blir det nok til at eg sel bilen.

Fleire saker