Nøyaktig klokka 12 fredag blei skuleplassar over heile landet fylt med danseglade elevar i det som truleg er Noregs største flashmob; BlimE-dansen. Heile 650 skular, med tilsaman over 135.000 born deltok og filma hendinga.
– Her er det 260 elevar som er med.
– Dei har øvd ute i klassane, før vi hadde ei felles gjennomkøyring i samband med FN-dagen i går, fortel inspektør Henrik Johannessen.
Lastar opp på NRK
Saman med Lysekloster, Nore Neset og Halhjem barneskular deltok Lunde i den nasjonale mønstringa.
Med tre kamera filma skulen hendinga.
– No er det berre å setja seg ned for å redigera den, før vi lastar den opp på NRK Super.
– Der kan ein etterkvart sjå video frå skulane som deltek, forklarar Johannessen.
Slapp snøen
Også i fjor deltok Lunde på dansen.
– Vi var litt heldigere i med vêret i år.
– I fjor snødde det nemleg då vi dansa, avsluttar inspektøren med eit smil.
Video, 1:01: Sjå klipp frå Lunde barneskule sin BlimE-dans (foto: Andris Hamre/Midtsiden)