Lynet slo ned i minst to hus

Bildeserie:

1 av 6

Fredag mellom klokka 5 og 5.40 var det ein serie med lynnedslag i Os. Minst to av nedslaga var i bustad.

– Det blei slått full alarm. Først rykte vaktlaget ut til Berge. Då resten av styrken hadde vore innom stasjonen og var på veg til same brann, blei vi omdirigert til Varåsen, fortel brannsjef Stein Gjøsund.

På Berge kom det røyk frå taket. Då brannvesenet løfta av delar av takdekket kom det opne flammar.

– Vi sløkte med vatn, men var varsame med forbruket for ikkje å skapa større skade enn nødvendig, seier Gitle Smaadal.

Nabo filma mens lynet slo ned

I Varåsen var det ein nabo som varsla både huseigar og brannvesen. Også BKK og politiet rykte ut.

– Eg vakna av torden og sette meg i stova og filma litt. Så kom det ein kjempesmell i nabohuset, fortel vitnet.

Dette var klokka 05.20.

Det kom røyk frå taket, og huseigar fortel at heile sikringsskapet blei slått ut. Brannvesenet sjekka med varmesøkande kamera, men røyk blei ikkje til eld i dette huset.

Taket er skadd og ei utelykt er knust.

Vitnet filma ikkje direkte på nabohuset, men du får eit visst inntrykk av smellen i videoen under.