Lysande start for 2Villa
2Villa, som har opningsdag i dag, gler seg allereie over god respons, ikkje minst for siste nytt; «månelampar» frå Italia.
Kjetil Vasby Bruarøy
I dag opnar 2Villa dørene til sitt nye showroom i Os Næringspark.
Les òg: Frå garasjesal på Drange til showroom på Os
Familien Skåtøy har allereie hatt godt besøk.
– Vi hadde ein liten snikpremiere på fredag, med nydeleg mat og rundt 40 venar og familiemedlemmar innom lokalet eit par timar, fortel Mona B. Skåtøy.
– Vi hadde i utgangspunktet ikkje sal denne kvelden, men det blei selt ganske mykje. Heldigvis gjekk det ikkje altfor hardt utover utstillinga, ein del av det var bestillingsvarer.
Kan få agentur
Mona synest det er godt å få god plass til varene som til no har vore selt via nettbutikk frå foreldra sin garasje på Drange.
– Det var òg kjekt at vi fekk inn det siste nye no før opninga, seier ho og peikar på nokre store, kvite ball-forma lampar i ulike storleikar.
– Vi har allereie fått mykje merksemd for desse. Dei er produserte i Roma i Italia og vi er dei første i Noreg som har dei for sal. No jobbar vi med å få agentur på lampane.
Før opning var det over ti skodelystne innom lokalet, som i utgangspunktet skulle vera eit showroom, men som fort kan ta form som ein travel butikk.