Lysekloster hadde full kontroll på Os

Bildeserie:

1 av 19

Lysekloster og Os avslutta i dag årets serie med derby i Lysefjorden.

Ingen av laga hadde noko anna enn plassering å kjempa om.

Lysekloster - Os 3-1 (2-0)
Mål: 1-0 (sjølvmål, Andreas Støle-Hansen), 2-0 Joachim Sæle Westrheim (44.), 3-0 Westrheim (50.) og 3-1 (Roger Blokhus Ekeland (74.).
Tropp og detaljar på fotball.no
Dagens Lysekloster-spelar: Joachim Sæle Westrheim
Gule kort: 1 til Lysekloster, 4 til Os

– Kampen blei i grunnen som venta. Det var to lag som ønskte å vinna, men vi dominerte og vann fortent, seier Lysekloster-trenar Ruben Hetlevik.

– Men vi dominerte meir enn venta og skapte overraskande mange sjansar, eg trur det berre er Valdres vi har skapt fleire sjansar mot i år. Eg hadde venta meir motstand.

Kampen var jamn det første kvarteret. Os hadde dei første småsjansane, Lysekloster dei største. 1-0 kom på eit sjølvmål i eit uheldig forsøk på å klarera etter corner, 2-0 på eit fint angrep.

Vertane gjekk opp i 3-0 tidleg i 2. omgang. Os var frampå nokre gongar, men vertane hadde dei klart største sjansane også på stillinga 3-0.

Skuffa Os-trenar

– Vi starta bra, men så blei det for mykje strekk i laget og for lite intensitet.

– Eg er skuffa over at vi ikkje fekk vist oss frå vår beste side i ein kamp som denne, og det trur eg spelarane er òg, seier Os-trenar Endre Brenne.

Tobias B. Nøss debuterte for A-laget til Os då han, saman med Elias H. Myrlid, kom innpå i 85. minutt.

2. og 11. plass

Lysekloster landa på 2. plass 3 poeng framfor Djerv 1919, som tapte 4-0 for serievinnar Vard Haugesund i dag, Os blei liggande på 11. plass, rett over streken, 7 poeng framfor Vestfossen, som slo botnlaget Valdres 9-0 i serieavsluttinga.

Os tar nokre veker ferie, Lysekloster går til dekka bord i klubbhuset for å feira årets sesong.

– Det blei dessverre ikkje ein opprykkssesong, men vi har gjort det bra, tatt 54 poeng, skåra 85 mål og avslutta med velfortent siger i lokaloppgjeret. Det blir god energi å ta med seg til kveldens fest, seier Ruben Hetlevik.

Sånn endte tabellen:
1. Vard Haugesund 63 poeng
2. Lysekloster 54 poeng
3. Djerv 1919 51 poeng
4. Fyllingsdalen 50 poeng
5. Fana 48 poeng
6. Stord 40 poeng
7. Strømsgodset 2 39 poeng
8. Sogndal 2 35 poeng
9. Brann 2 33 poeng
10. Fjøra 33 poeng
11. Os 31 poeng
12. Vestfossen 24 poeng
13. Bergen Nord 17 poeng
14. Valdres 3 poeng