Lysekloster sterke mot Sotra

Etter 6-0 over Varegg og 3-0 over Sandviken før vinterferien, var Lysekloster laurdag klare for nok ein treningskamp mot 2. divisjonslaget Sotra.

Lysekloster landa på 9. plass i 3. divisjon i fjor, Sotra på 10. plass i 2. divisjon.

Førre treningskamp mot Sotra enda med 1-5-tap. I går var Lysekloster sterkast.

Kampen blei flytta frå planlagt arena i Sotrahallen til Lysekloster sin heimebane.

Lysekloster - Sotra 2-1 (1-0)
Målskårarar: 1-0 Tobias Heltne Alme (4. min), 2-0 Fiton Durkiti (71.) og 2-1 Kristoffer Røttingen.

Lysekloster frå start:
Vitaly Melnichenko
Tobias Heltne Alme
Keith Groeneveld
Toni Takamaki
Aboubacar Conde
Håvar Kleppe
Lionel Kamanzi
Håvard Rinde
Erik Olaf Krohnstad
Fiton Durguti
Christian Dahl

Innbytarar:
Johannes Lie
Andreas Uran
Tobias Nøss
Eskil Instebø
Mikael Baisotti
Tom-Rune Sæle
Kasper Bordvik
Håkon Botn Brautaset
Tommy Svendsen
Fredrik Lee

Lysekloster brukte fleire nysignerte spelarar og tre på prøvespel i kampen. Vi kjem tilbake med meir om dei nye spelarane i eiga sak.

– Dette var ein god prestasjon av gutane. Det var jamt, men eg synest vi vann fortent, samtidig fekk vi mange svar på kvar vi står, seier Lysekloster-trenar Ruben Hetlevik.

– Kva var oppgåvene i denne treningskampen?

– Vi ville opna med høg intensitet, og sjå kor lenge vi kunne halda denne intensiteten oppe. Du kan kalla treningskampen ein kondisjonstest for vår del.

Trykket varte i drygt 60 minutt.

– Samtidig var oppgåva å ikkje mista strukturen då vi byrja å gå tom for krefter. Der var vi ikkje like gode, verken på å forstå kor tid vi skulle roa ned, eller på å koma i balanse då vi tok ned tempoet. Sotra, som også skifta formasjon, kom litt inn i kampen, og det blei noko tøft dei siste 20-30 minutta.

Sotra klarte også i redusera.

Målet kom på ein fin chip av osingen Kristoffer Røttingen, hans første skåring etter overgang frå Os til Sotra.

– Dette var kjekt! Eg trivst godt i ny klubb, og fekk 15-20 minutt etter to veker ute med skade, fortel Kristoffer.

Han fekk to spark i same legg i treningskamp mot Vard Haugesund. Leggen svulma opp, men det var heldigvis ikkje noko brot.

– Tilbake i trening etter ei veke fekk eg eit overtråkk, så då blei det ei veke til med pause. Men det kjentes godt ut å spela i går, og i dag fekk eg 70 minutt for Sotra 2 mot Djerv.

Sotra 2 vann 5-0, men det blei ikkje nettkjenning på spissen frå Øyane i denne kampen.

Lysekloster speler neste treningskamp heime mot Øygarden, som landa på 7. plass av 14 lag i PostNord-ligaen (2. div) i fjor.

– Det blir vår klart tøffaste treningskamp i denne oppkøyringa, seier Ruben.

– Eg trur vi bør venna oss til dette tempoet. Det er eit par av motstandarane våre i serien som kjem til å halda same nivå som nedste halvdel av 2. divisjon, som Fana og Vidar, og då skal du ikkje gjera mykje feil før du har dei i 16-meteren din.

Kampen går laurdag klokka 15.

Helga etter, søndag 20. mars, er det NM-kvalik borte mot Tertnes. Os speler NM-kvalik dagen før, borte mot Sund.

– Så skal vi ha ein treningskamp etter kvalik, før seriestart, treningskampen går i Åsane Arena mot Florø.

Florø tok 12. plass og rykte ned frå PostNord-ligaen i fjor.

Seriestart er mot Vidar i Stavanger.