Ny dobbelhall opna i fjor haust. No er det ledig plass i hallane. (Foto: Kjetil Vasby Bruarøy)

Lyser ut ledig tid i ny dobbelhall

– Noko plass har blitt frigjort, og det kjem meir, seier Os idrettsråd.

Av: Kjetil Vasby Bruarøy

Os idrettsråd, som styrer tildeling av treningstid i Os kommune (og det kommunale selskapet Os idrettspark) sine anlegg, la onsdag kveld ut oversikt over ledige tider i Os idrettspark sine tre hallar.

I fjor haust fekk Oshallen selskap av ny dobbelhall - sjå video og bildeserie frå opningsfesten.

Både dobbelhallen og gamle Oshallen har no ledig kapasitet.

– At Os handball si herregruppe trekte seg frå serien har påverka kapasiteten, i tillegg har nokre lag slått seg saman eller sett opp fellestrening, forklarer leiar i Os idrettsråd, Jarle Heltne.

I tillegg har nokre lag sagt frå seg treningstid.

Nesten for kven som helst

– Vi opnar òg for at uorganiserte grupper kan søkja om treningstid, for eksempel ein kameratgjeng som vil trena fotball.

– For born under 18 år sørgjer kompensasjonsordning for at innetrening blir kostnadsfritt. Vaksne må betala.

Alt fellesutstyr i hallen kan nyttast av leigetakarar, men det er begrensa plass for oppbevaring av eventuelt medbragt spesialutstyr.

Det er eit vilkår for utleige at aktiviteten blir godkjent og at den ikkje uroar andre leigetakarar eller fører til skade på lokale eller utstyr.

Tidleg og seint

I skrivet om ledig kapaitet ligg òg eit skjema med oversikt over tider i alle dei tre hallane.

Mesteparten av det som er ledig er før klokka 17 og etter klokka 21, men det er visse unntak, spesielt om fredagen.

Tildeling blir tatt fortløpande etter kvart som søknadar kjem inn.

Detaljar finn du på Os idrettsråd sine heimesider.

Meir treningstid blir snart frigjort

Det ledige arealet, som fekk midlar til innreiing i førre budsjett, vil føra til at karate og taekwondo flyttar opp ein etasje.

Då blir yttarlegare areal i hallane frigjort.

– Eg har forstått det sånn at det nye arealet i 2. etasje blir klart rundt nyttår. Uansett er det ikkje lenge til vi får endå ei kapasitetsauke.

 

Fleire saker