Må betala bompengar likevel

For to veker sidan blei det kjent at regjeringa gjekk inn for å droppa bompengar på sambandet Halhjem-Sandvikvåg i samband med finansiering av fylkesveg 545 på Fitjar. Dette er i tråd med kommunestyret i Os sitt fleirtal.

– I høyringsrunden var Os kommune klar på at innkrevinga ikkje burde forlengast då nytteprinsippet blei brote. Bilistane på E39 og ferjesambandet skal ikkje betala for ein fylkesveg på vestsida av Stord, meiner ordførar i Os, Terje Søviknes.

Søviknes kalla regjeringa si avgjerd ein gledens dag for bilistane, som kan sleppa 27 kroner billigare unna per ferjetur. Lastebilar vil spara 127 kroner per tur.

Fekk ikkje fleiretal

Transport- og kommunikasjonskomiteen i Stortinget kom i dag med si innstilling i saka «endringar i statsbudsjettet 2014 under Samferdselsdepartementet».

Der gav KrF og Venstre, saman med dei raudgrøne, fleirtal for vidare bompengeinnkrevjing i to nye år.

– Det er beklageleg at KrF og Venstre påfører dei reisande dyrare billettar for å betala for ein veg dei ikkje bruker, seier leiar for kommunal- og forvaltningskomiteen, Helge André Njåstad (Frp).

– Kunne fint vore løyst utan bompengar

Høgre og Frp har til saman 7 av dei 15 medlemmane i Transport- og kommunikasjonskomiteen. Venstre og KrF har kvar sin representant, men ingen av desse støtta regjeringa i dag.

– Den aktuelle vegen på Fitjar treng utbetring og sidan det er ein fylkesveg er det fylkeskommunen sitt ansvar.

– I statsbudsjettet for 2015 har vi auka løyvingane til fylkesvegnettet og auka rentekompensasjonsordninga slik at fylkeskommunen kan, om dei prioriterer denne vegen, fint løysa det utan bruk av bompenger frå bilistar på E39.

– Det er skuffande å sjå kor ivrige fleirtalet på stortinget er til å kreva inn bompengar, seier Njåstad.

– Ein viktig avlastingsveg

Hans Fredrik Grøvan (V) er medlem av Transport- og kommunikasjonskomiteen og seier han har støtta seg til lokale og regionale uttalingar i høyringsrunden.

– Det viser seg at rundt 15 prosent av trafikken frå ferje går nettopp over denne fylkesvegen. Dessutan er det ein viktig avlastingsveg om E39 i periodar er stengt.

– Vi har dessutan liten tru på at dei ekstra løyvingane til fylkesvegnettet ville vore ei god og rask nok løysing, desse midlane er heller til vedlikehald, ikkje til denne typen investering, seier Grøvan.

Saka skal opp i Stortinget 18. desember.

– Det blir nok litt debatt når saka skal opp, men eg trur nok bilistane får finna seg i å betala bompengar i to år til. Men så er det stopp.