Må få svar i år

Torsdag inviterte Statens Vegvesen til folkemøte i Oseana i samband med oppstarten av bygginga av E39 mellom Svegatjørn og Rådal. Eitt av tema som kom opp var fylkesvegen frå Åsen til Helleskaret.

Prosjektleiar Sverre Ottesen fortalde at dette er ein veg som ligg utanfor prosjektet, men at dei i kontrakten med Veidekke har ein opsjon på at entreprenøren skal bygga denne òg, berre fylkeskommunen bestemmer seg.

– Vi må ha eit vedtak frå fylkeskommunen om at den blir prioritert i løpet av hausten. Vi treng ikkje pengane no, men vi må ha vedtaket før nyttår.

– Då vil vi nytta våren på å prosjektera vegen, slik at vi kan bestille den hos Veidekke innan fristen som er sommaren 2016, fortalde Ottesen.

Galskap å ikkje gjera det

Då det ikkje er ein statleg veg, er det opp til fylkespolitikarane å vedta den. Os kommune har allereie prioritert den inn mot rulleringa av fylkeskommunen sin transportplan.

Ordførar, og fylkespolitikar, Terje Søviknes (FrP) fortalde at han hadde god tru på at ein skulle lykkast i å få dei naudsynte vedtaka på kommunen.

– Ein vil ikkje kunne ta det i rulleringa av den regionale transportplanen. Då vil ein ikkje klara å halde fristen, så det må skje raskare.

– Eg vil seie at det nesten er galskap om vi ikkje gjer det no, når vi har maskiner, masser og folk på plass til å byggja den. Det har vore dialog både på politisk og administrativt nivå i fylket og vi vil helda fram med å jobba for å få vegen mellom Åsen og Helleskaret inn og opp. Eg har god tru på at vi skal klare det, sjølv om vi no må gjera arbeidet på ein litt anna måte med det resultatet vi fekk i valet, fortalde Søviknes.