Må finna ny plass
Fylkeskommunen skrinlegg pendlarparkering ved Kuven stasjon. Løysinga blir for dyr. Samtidig deler dei ut pengar til fleire prosjekt i Os. Sjå liste.
Midtsiden skreiv i september om planane om å etablera pendlarparkering på myra ved Rema 1000 Kuven. No viser det seg at den løysinga blir for dyr.
I formannskapet tysdag orienterte ordførar Terje Søviknes (Frp) frå fylkestinget, der Os har fått løyvd midlar til fleire fylkeskommunale vegprosjekt i kommunen. Sjå oversikta nedst i saka.
- Når det gjeld pendlarparkeringa ved Kuven stasjon har fylkeskommuen kome fram til at det blir for høge kostnadar med grunnarbeida.
- Dei såg seg nøydde til å fundamentere parkeringa med pæler og det blir for dyrt, forklarte ordføraren.
Fylkeskommuen har no bedt Os kommune om å starta planarbeidet for å finna ein ny plassering av parkeringa. Til dette planarbeidet har fylkeskommunen bevilga 300.000 kroner.
Tøsdalsskiftet eit alternativ
Den mellombelse løysinga der leiger areal frå Rema 1000 går i utgangspunktet ut i sommar.
- Vi må sjå på det i helikopterperspektiv.
- For meg fell Tøsdalsskiftet inn som eit naturleg alternativ, der ekspressbussar kan kjøra frå Osøyro til Tøsdalsskiftet og så rett på den nye vegen når den er klar.
- Området er regulert til landbruk så det er viktig at vi kjem igang med prosessen om vi går for dette alternativet, avslutta ordførar Terje Søviknes.
Fylkeskommunale tilskot til veg i Os
Rundkøyring ved Amfi Flåten - 2 millionar kroner
Eit spleiselag mellom fylket, kommunen og Amfi Eigedom. Totalkostnad 6 millionar, ferdig nov 2012
Forskuttering anleggsveg Endelausemarka - 30 millionar kroner
Det tyder at anbod kan lysast ut i vår og at dei fysiske arbeida kan ta til hausten/vinteren 2012
Haldeplassar, universell utforming Osøyro - Tøsdalsskiftet - 2,25 millionar kroner
Opprusting av busshaldeplassane mellom Osøyro og Tøsdalsskiftet. Arbeidet pågår.
10 stk nedsett fart + fartshumpar - 2 millionar kroner
Gjeld sentrumsnære områder på fylkesveg 552/159/160
4 stk signalregulerte gangfelt FV 522 - 4 millionar kroner
FV 522 i utkanten av sentrum, mellomanna Solstrandskrysset
Gang- og sykkelveg Irgensgrinda-Ulven - 1 million kroner
Strekninga frå innkøyringa til Ådnadalen til Irgensgrinda. Kommunal medfinansiering manglar.
I tillegg er det lagt inn planmidlar til regulering av fylkesveg 158 Gindavoll-Lepsøy bru. Ferdig regulert i løpet av 2012.