Må fjerna trimsett
Tre mopedar og ein skuter kontrollert, ein fekk pålegg om å fjerna trimsettet. I tillegg fekk politiet melding om mistenkeleg oppførsel på Amfisenteret.
Onsdag kontrollerte politiet tre mopedar og ein skuter på Osøyro.
- Den eine blei stoppa oppe på Hatvikvegen. Det viste seg at mopeden var trimma og eigaren fekk pålegg om å fjerna trimsettet og å få skikkeleg skilt på den.
- Det er uheldig å køyra med trimma moped, åtvarar politioverbetjent Terje Sperrevik.
- Ikkje berre det at mopedane ikkje er konstruert for høgare fart enn det dei er levert med, men det kan òg få langsiktige konsekvensar for føraren om denne blir meldt og får ein dom på seg.
- Det kan gjera at ein til dømes ikkje får innreisetillatelse til USA om ein vil dit å studera når ein blir eldre, seier Sperrevik.
Mopedisten som blei stoppa må nok ta seg ein tur ned til biltilsynet for å visa at mopeden er i forskriftsmessig stand etter pålegget frå politiet.
Spesiell oppførsel på senteret
Politiet fekk onsdag ettermiddag melding om fire, truleg austeuropearar, som oppførte seg noko spesielt på Amfi Os.
- Dei kom inn på senteret saman og splitta opp.
- Då dei oppdaga at dei hadde blitt observert byrja dei å kommunisera med kvarandre på lang avstand før dei stakk frå staden, fortel Sperrevik.
Det er ikkje kjend at noko blei stolen.