Magisk ved fjorden

Berre timar før konserten kom det heftigaste regnskyllet som har vore på Os denne sommaren, men også vêrgudane såg ut til å vera i godlynne då utescenen på Oseana skulle takast i bruk for første gong.

- Ein del kallar meg pessimist, sjølv ser eg meir på meg som ein realist - og det regnar alltid når eg skal spele utendørs.

– Men, sjå no! Dette er berre fantastisk, helsa Gøran Fristorp der han sto og såg mot Folgefonna over ein blikkstille Bjørnefjord.

Duvande tonar

Dei to veteranane i norsk og svensk musikk, Viggo Sandvik og Gøran Fristorp, viste at visekunsten meistrar dei til fulle, også når dei syng på kvarandre sitt språk. På utescenen fekk vi mellom anna Sandvik med Taube sin "Flickan i Havanna" og Fristorp med Prøysen si "Vise for gærne jinter" etterfølgt av ei rekkje av visemeisterane Taube og Prøysen sine kjente låtar.

Dei to karane på scenn, forsterka av Steffen Isaksen på piano og Bjørn Holm på kontrabass, har ikkje reint lite å by på av eige reportoar heller. Konserten var godt bunden saman av små anekdoter og artige historiar. At Viggo Sandvik er ein showmann visste vi, men herr Fristorp står ikkje mykje lengre bak, om enn med ein litt avdempa stil.

Saman leverte dei ei mjuk og deilig stemning i sommarkvelden.

- Sommarens store høgdepunkt

Rundt 140 betalande tilskodarar fann vegen til terrassen framfor Oseana denne sommarkvelden. Det hadde vore plass til fleire, men dei som kom koste seg.

- Dette er magisk og sommarens største høgdepunkt, ja nest etter det eg sjølv gjorde under jazz- og bluesfestivalen, smilte trommeslagar Magne Lunde.

Neste laurdag er det igjen duka for arrangement på utescena då sommarshowet med Nils- Ingar Aadne, Jonna Støme og Cecilie Steinmann Neess vitjar Os. Om du har vore uroa for at utescenen ikkje fungerer så er det berre å slå det frå seg og ta turen. Den funkar til det fulle!