Målrikt på Kuventræ
Utvisning øydela for Os, som tapte 4-5 for Fyllingsdalen 2.
Det blei eit målrikt oppgjer på Kuventræ søndag ettermiddag. Allereie etter to minutt var Christian Heimark frampå for gjestane og tok Fyllingsdalen opp i leiinga.
Ti minutt seinare var Christer Olsen på rett plass då Erik Kanestrøm kom rundt på kanten og breisida inn utligninga.
Berre to minutt seinare skjedde det som blei det store samtaleemnet på Kuventræ; Torkel Hjertnes fekk direkte raudt kort etter duell med ein angrepsspelar i grensa til 16-meteren. Dommaren meinte at dette skjedde innanfor 16-meteren.
Fyllingsdalen tok dermed leiinga igjen, også denne gong ved Christian Heimark.
– Kampen blei øydelagt i den situasjonen.
– Hendinga startar utanfor 16-meteren, ein skulderduell der Torkel er sterkast, det motspelar ramlar inn i 16-meteren. Ikkje skulle det vore straffe og ikkje skulle det vore raudt kort, meiner Os-trenar Jørn Vegard Berge.
Blei frustrerte
Tydeleg frustrerte Os-spelarar klarte ikkje justera seg og ta tak i kampen etter straffen og utvisninga. I løpet av dei neste seks minutta skårar Fyllingdalen to gongar. Først med tremålsskårar Christian Heimark, så ved Eirik Broms.Det står 1-4.
I den perioden hang ikkje Os-forsvaret med.
Etter å ha fått rista skuffelsen og frustrasjonen av seg, kjem Os tilbake. Anders Kinden fyrer av eit skot frå vel 20 meter som smell i tverrliggeren, og som truleg sprett på innsida av streken, men dommaren let spelet gå vidare.
I staden er kaptein Stian Lunde frampå etter 39 minutt og set ballen kontrollert under Fyllingsdals-keeperen frå 14 meter.
Med éin mann mindre missar Os igjen ei markering og Fyllingdalen går til pause med tre måls-leiing, 2-5, etter at Martin Haanes får stå umarkert.
Skulle vinne 2. omgangen
I pausen blir Os-spelarane einige om å vinna 2. omgangen.
Etter kvarteret spelt vinn Christer Olsen ballen i midtsirkelen, set fart ut mot høgre kant, kjem seg ned på hjørnet av femmeteren og legg tilbake til Anders Kinden som kjem i andre bølga og breisider ballen i mål.
– Eg synest vi gjer ein god 2. omgang, men Fyllingsdalen hadde ein kjapp ving og ein kjapp spiss, så vi kunne ikkje gå med alle mann i angrep. Då hadde vi fort fått kontringar imot.
– Dei har vel knapt nok éin skikkeleg sjanse i andre omgang, oppsummerer Berge.
I siste ordinære speleminutt blir Roar Vestbø, som hadde kome inn for Kinden, rive ned innanfor 16 meteren. Erik Kanestrøm gjer ingen feil frå straffemerket og reduserer til 4-5.
– Det er mykje positivt i dag. Vi tørr spela ball. Utanom 10 minutt rett etter utvisninga, så er vi det beste laget i dag, meiner Berge.
Os - Fyllingsdalen 2 4-5 (2-5)
Raudt kort: Torkel Hjertnes (Os). Gult kort: Joakim Jensen (Fyllingsdalen), Emilis Zilinskas (Os)
Frode Moberg Øvredal, Børge Borgen, Emilis Zilinskas, Glenn Krossøy, Torkel Hjertnes, Stian Lunde, Erik Kanestrøm, Anders Kinden (Roar Vestbø, 70), Ørjan Glesnes, Christer Olsen, Joakim Hovden (Knut Spangeli Haga, 62) .