Bildeserie:
Då første del av rehabiliteringa av Os ungdomskule sto klar før skulestart i haust var det også med ei heilt ny innreiing og teneste; kantine.
Der kan elevane få servert lunsj kvar dag, både varm og kald mat står på menyen.
- Elevane kan kjøpa seg eit halvårsabonnement om dei ønskjer å få lunsj på skulen, fortel dagleg leiar ved kantina Turid Leikvoll Hjelle.
I tillegg er det sal av blant anna baguettar, yoghurt og drikke for dei som ønskjer det.
Dei som ikkje har fast lunsjavtale kan bestilla enkelte dagar. Når menyen for dei neste dagane blir lagt fram er det fleire av dei utan avtale som bestiller.
– Spesielt dei dagane det er taco på planen, då er det gjerne 50 ekstra til lunsj.
Elevar hjelper til
Turid er einaste faste tilsette ved kantina, men med seg har ho fem elevar som arbeider kvar sin vekedag i eit halvt år, og etter jul har ho fått med seg Vida Paliutiene tre dagar i veka.
– Elevane har søkt om å få arbeid her og bruker ein time før, under og etter lunsj på arbeidet.
To av elevane i kantina er Nikita Sudmann Viken og Tiril S. Haaland, begge frå klasse 9 E.
– Eg søkte på jobb her fordi det verka veldig gøy og så er det kjekt av vi får attest når vi er ferdig, seier Tiril.
– Folk er veldig hyggelege og vi har lært masse av å vera her, fortel Nikita, som også jobba i kantina i haust.
Nikita har merka stor utvikling i kantinelivet sidan starten i haust.
– Elevane rota ein del i starten, men no har eg ikkje rydda eit eineste fat sidan før jul, så det har vore stor framgang.
Variert meny
Då Midtsiden besøkte ungdomsskulen var det laks som sto på menyen.
– Eg prøver å få inn eitt fiskemåltid i veka, men det er ikkje alltid så lett, sidan det er dyrt med fisk, seier Turid.
Budsjettet seier 20 kroner dagen per elev, så det skal ein del planlegging til for å få økonomien til å gå i balanse.
– Men eg har ein del erfaring frå tidlegare, så det har gått fint.
Turid har dei siste åra vore eigar av Fisketorget Os, som ho selte i haust. Også før ho starta Fisketorget jobba ho med mat.
60 fleire etter nyttår
Det fyller seg raskt opp med elevar når det ringer ut til storefri. Blant 420 elevar så er det 200 som har bestilt lunsjabonementet i vår.
– I haust var det 140 faste brukarar av kantinetenesta. Det er kjekt å sjå at mange held fram og at nye kjem til.
To av elevane som får lunsjen servert kvar dag er Marielle Engelsen og June Heggland. Dei er veldig nøgde med tilbodet.
– Maten er som oftast kjempegod og eg liker at eg har fått betre tid på morgonen, når eg no ikkje lenger må å laga matpakke kvar dag, seier Marielle.
Favorittane til Marielle og June er taco og laks.
– Tacoen er veldig populær, det er også pizzabaguettane og kyllingwraps, fortel Turid.
– Takka vera Turid
Rektor ved Os ungdomskule, Kåre Lutro, er ikkje mindre nøgd enn elevane med det nye kantinetilbodet.
– Då vi starta planlegginga av rehabiliteringa av skulen så høyrde vi med både elevar, foreldre og tilsette om kva ønskje dei hadde.
– Noko som gjekk igjen blant alle var at dei ønska ei kantine på skulen, og det fekk vi til.
– Kantina har no blitt den viktigaste møtestaden for elevane i friminutta, fortel Lutro.
På førehand har dei brukt mykje tid på å setja saman menyen for elevane, maten skulle vera sunn og god.
– Oppstarten og vidare drift av kantina har gått knirkefritt, og det er takka vera Turid, den beste kjøkkensjefen vi kunne ha fått, rosar Lutro.
– Ho er strategisk, dyktig og veldig flink med ungdomane. Elevane har respekt for Turid samtidig som dei er glade i ho.
Meir utstyr
Budsjettet for hausten gjekk i balanse, faktisk med eit lite overskot så kjøkkenet no kan bli utstyrt med ein koketopp for store gryter.
– Og så kjem det snart opp fire mikrobølgeomnar, så dei som har med seg mat heimefrå kan varma den i kantina.
Lutro merkar at elevmiljøet har hatt godt av den nye kantina, det har blitt meir ro blant elevane og kantina har blitt eit møtepunkt på skulen.
– Vi hadde ingen mål då vi starta opp, så at det har gått så bra er heilt fantastisk.
– Kantina er blitt hjarta på skulen vår, avsluttar ein glad rektor.