Bergen tinghus. (Foto: Kjetil Vasby Bruarøy)
Bergen tinghus. (Foto: Kjetil Vasby Bruarøy)

Mann i 70-åra dømt for køyring med 1,9 i promille

Køyrde vinglete og parkerte i ein busk.

Kjetil Vasby Bruarøy
19. februar 2020 - 10:30

Ein søndagsmorgon i september i fjor fekk politiet melding om vinglete køyring mellom to krinsar i Os.

Politiet fann bilen, parkert i nokre buskar, etter ein køyretur på rundt 15 kilometer.

Bilførar var full, og forklarte at han ikkje hadde drukke etter at han hadde parkert. Blodprøvar tatt cirka 1,5 og 2 timar etter køyring viser 1,91 og 1,79 promille, altså nedgåande.

Retten fann det bevist at sikta hadde køyrd bil med over 1,2, og minst 1,9, i promille.

Sikta, ein mann i 70-åra, møtte i retten og tilsto.

Dømt til fengsel

Retten la i skjerpande retning vekt på at sikta hadde vore synleg full mens han køyrde bil, sidan køyringa var vinglete og parkeringa var inn i nokre buskar.

Vidare var det skjerpande at køyringa hadde vore over ein rimeleg lang avstand, men alvoret var noko moderert då dette var ein søndag morgon med lite trafikk på vegen.

Utan tilståing ville 30 dagar fengsel vore passande, men sikta fekk noko rabatt.

Han blei dømt til 24 dagar fengsel og 25.000 kroner i bot. Han taper også retten til å køyra bil i to år, og må avlegga full ny førarprøve før han eventuelt kan setja seg bak rattet igjen.

Les meir om

Lokal Politi