Marius klar for NM i ishockey

Til helga er det NM i kretslag i ishockey i Hamar OL-Amfi. Rogaland og Hordaland stiller med samla kretslag for Vestlandet, der 5 av dei 20 på U15-kretslaget frå Vestlandet er frå Hordaland.

– Vi har godt samarbeid med Rogaland og er ofte i Stavanger på samling og kamp. Det var veldig kjekt å bli tatt ut på laget, seier Marius Tømmernes Klakegg frå Søfteland.

Det er tre ishockeyklubbar i Bergen; Fana, Lydehorn og Bergen Ishockeklubb, der Fana berre har A-lag. Alle dei fem frå Hordaland som er tatt ut er frå BIK.

Med seg til NM får Klakegg klubbkameratane Lars Magnus Andersson, Chippey Bangu, Marius Holmefjord og Sebastian Johannessen.

Dei resterande kretslagspelarane er frå Stavanger Ishockeyklubb, inkludert bergensaren Christoffer Skjold Fløholm, som nyleg har meldt overgang til Stavanger.

– Høgt nivå på Austlandet

Sjølv om det er fleire klubbar og større ishockeymiljø på Austlandet, trur Klakegg at vestlendingane kan slå frå seg i NM.

– Då Stavanger spelte mot Lørenskog, som leiar serien, tapte dei berre 1-3. No når dei supplerer laget med dei beste frå Bergen bør vi ligga greit an, sjølv om det nok blir tøft å koma på pallen.

Osingen er ein av dei to målvaktane på laget. Den andre keeperen heiter Eric Gilje.

Starta då han var 3 år

Marius, som fyller 15 år til sommaren, byrja med ishockey då han var 6 år.

– Pappa, som har spelt ishockey i 2. divisjon i mange år, tok meg med då eg var 4 år. Då var eg visst ikkje interessert.

– Men begge veslebrørne mine speler også ishockey, seier Marius om Stian (11) og Simen (7).

– Han yngste var berre 3 år då han starta.

– Det er utruleg kick å spela ishockey. Det er fart og action heile tida, verdas beste sport, spør du meg, seier pappa Dag Rune Klakegg.

Fleire unge osingar på isen

Familien Klakegg bur rett ved Vindalsvatnet på Søfteland, og har dei siste vintrane hatt fin skøyteis utanfor stovedøra.

– Det er kjekt å leika seg på isen med venar og naboar.

– Og det er fleire enn oss som reiser til Bergen for å trena ishockey, vi er vel 8-10 aktive no, både gutar og jenter.

Bergensarar og spelarar frå nabokommunane trener i Bergenshallen og Iskanten. Frå dei er 8 år er det cupar og kampar på full bane, medan vestlandsserien er for dei frå 12 år og opp i alder.

– Ishockey er i vekst, eg håper det kjem fleire banar i eller rundt Bergen, seier Marius, tre dagar før NM.