Måtte byta sal

Bildeserie:

1 av 3

Foredraget for seniorane i Os skulle haldast i Vargasalen i Oseana, ein sal som kan ta 150 personar. Før jul var dei godt nøgd med 135 deltakarar på årets siste foredrag, der Bård Ose fortalde om musikken på 60-talet.

– Vi har seld 40 sesongkort på førehand, i fjor var det rundt 80 med sesongkort, medan vi selte 460 enkeltbillettar i 2015, fortel leiar i Os senioruniversitet, Olav Søfteland.

Då klokka nærma seg 11 og starten på foredraget, hadde folka frå senioruniversitetet tatt ut alle stolane dei kunne, og framleis var det mange som sto i billettkø.

– «All time high»

Dei tilsette i Oseana kasta seg då rundt og opna opp Oseanasalen så alle dei frammøtte skulle få plass.

– Dette er «all time high» for universitetet, med 230 frammøtte, fortel Berit Steen frå Oseana.

Førre rekord var i fjor på foredraget om Kysthospitalets historie, då kom det 180 publikummarar.

– Det spørs om vi ikkje må gå i forhandlingar med Oseana om å få fast plass i Oseanasalen, sa Søfteland, og kunne samtidig roa dei som var redd det skulle bli trongt om plassen fleire gongar.

– Alle dei andre foredraga i vårsemesteret er i Oseanasalen.

– Tenkte det kom 15- 20 stykker

På scenen denne dagen stod ein litt nervøs Geirr Vetti, fjellbonden som kalla seg husdoktor og steingal, og som har har henta sherpaer frå Nepal til å hjelpa seg med arbeidet.

– Dette er mitt første foredrag og bildeframsyninga gjorde eg ferdig i går.

– Eg tenkte det kanskje kom 15 - 20 stykker i dag, så då eg såg det store oppmøtet var det rett før eg snudde i døra, seier Vetti og ler.

Men Vetti klarte seg fint på sitt første oppdrag som forelesar. Med bilde frå eit fantastisk landskap, både i Nepal og her i Noreg, med historiar til, og med vittige kommentarar, klarte han å fenga publikum.

Arbeidde på Bahus-fabrikken

Fleire i salen hadde tilknyting til den tidlegare Bahus Møbelfabrikk som var på Os. I 1984 - 85 og i periodar etter det så arbeida faktisk Vetti som modellsnikkar her.

– Eg budde hos Jimmy Øvredal i Øvredalen i den tida, fortel han.

Det var fleire som tok turen på scenaen for å helsa på han under pausen, både av gamle kollegaer og born av dei igjen.

– Det er fantastisk å vera tilbake i Os.

Ville ha hyllegard

Heilt frå han var 6 år har Vetti vore fast bestemt på at han skulle kjøpa seg ein hyllegard, og for 16 år sidan blei draumen til verkelegheit då han kjøpte garden Skåri i Luster i Sogn og starta å restaurera den.

Arbeidet på garden var knallhardt gamaldags gardsarbeid, og Vetti var gjennom 11 folkeslag på jakt etter dei rette arbeidshjelparane på garden.

– Det var då eg kom på at sherpaene i Nepal.

Veto meiner at dei er verdas sterkaste folkeslag, og grunnar det med at dei har større lungekapasitet og hjarte.

– Heile landsbyen skal hevast

Han starta med 2 sherpaer for 13 år sidan og no har han over 30 stykker i arbeid om gongen.

– Alle familiar skal få kunna koma, det var veldig viktig for sherpaene at ikkje nokre få kunne gjera seg rike på å koma her og jobba, heile landsbyen skal hevast.

Samarbeidet med sherpaene har ført til at Vetti har vore heile 9 gongar i Nepal, og landsbyane Khunde og Kumjung. Siste turen hans var saman med NRK i 2013, og det er frå denne turen seniorane i Os fekk sjå bilde og høyra historiar frå.

Har vunne fleire prisar

Heime i Noreg har Vetti og sherpaene «hans» blitt populære arbeidstakarar. Forutan arbeider med gamle bygningar har dei blant anna vore med å oppgradera vegen til Preikestolen, utbetring av Stolzekleiven og betre "veg" til Romsdalseggen. No er dei i gang med deira største prosjekt til no, å fiksa Kongevegen i Lærdal.

Geirr Vetti har vunne mange prisar, Luster kommune kulturpris, Ragnhild og Claus Heibergs minnepris og Riksantikvarens kulturminnepris.

Samarbeidet med sherpaene i Noreg har gjort at dei tilsaman har tjent inn 25 millionar kroner i dei to landsbyane i Nepal.