Måtte reisa frå kunsten sin i Spania - klar for vestlandsturné

I fjor trekte kunstnar Åse Berit Skeie Ulltang mykje folk til utstillinga «Nye landskap» i Vognhallen.

Eit lengre opphald i Korea var mykje av inspirasjonen til utstillinga, kunne Ulltang då fortelja.

Utstillinga sto i Vognhallen i berre ni dagar, men resulterte likevel i tre nye førespurnadar om å stilla ut.

– Første utstillinga opnar i Eidfjord allereie torsdag denne veka, i august skal eg stilla ut ved Hardanger kulturgalleri, Mælen i Jondal, og i oktober deltek eg på Olsvikutstillingen, fortel Ulltang.

Måtte forlata kunst i Spania

To dagar før opninga ved Galleri N. Bergslien i Eidfjord fortel Ulltang at oppkøyringa til årets sesong, ikkje uventa, vart prega av korona-pandemien;

– Sidan utstillinga i Vognhallen i fjor sommar eg har budd delvis i Spania grunna jobben til mannen min. 19. mars vart vi evakuerte heim til Noreg, og med ikkje anna enn handbagasje med på flyet, måtte eg dessverre reisa frå alt arbeidet eg hadde jobba med.

Ulltang let seg ikkje stressa av situasjonen, og fortel at ho no er klar til å stilla ut heilt ny kunst - laga i studioet i den gamle stasjonsbygningen i Os sentrum.

– Korea er framleis med, både i inspirasjon og materiale, dei sterke fargane er òg med. Men nytt dette året er òg ein del bilete i svart/kvitt.

– Du veit, du tek med deg sjølv kor du måtte reisa, så ja, det er framleis meg!

Sjå kunst og natur!

Trass i situasjonen ser Ulltang positivt på det heile;

– Det er spesielle tider med koronaviruset, men det er utruleg viktig og bra at samfunnet kan opna opp att. Me treng kunst og kulturarrangement no, og det kjennest godt å kunne væra med å delta på å skapa gode møteplassar.

På startstreken til ein sommar som vil gå inn i historia som den sommaren vi ferierte heime, har Ulltang òg ei klar oppmoding til dei som er glade i kunst og kultur;

–Eg håper folk tek turen til den vakre Eidfjord-bygda og opplever fantastisk natur som Vøringsfossen og Hardangervidda - og sjølvsagt stikk innom galleriet og får sett kunst!