Med 10 lag til Norway Cup

Bildeserie:

1 av 8

Sundag 1. august startar verdas største fotballturnering, sidan starten i 1972 har over 43.000 ulike lag deltatt i den store cupen. I år er 1380 lag på veg til Oslo og Ekebergsletta, 10 av laga er frå Os kommune, med gutar og jenter frå 12 til 19 år.

- I fjor stilte vi med to juniorlag, i år har vi så mange som har blitt senior at vi tar 18 gutar med og stiller med eitt lag, seier hovudtrenar Øyvind Steffensen.

I tillegg til juniorlaget stiller Os Turn med to gutelag og eit jentelag. Lysekloster stiller også med to gutelag og eit jentelag, Nore Neset stiller med gutelag og Søfteland/Kalandseid med jentelag og eit samansett SMG12-lag.

Hardtrening med Halhjem-brørne
I førre veke trente juniorane til dei spydde. Alternativ trening med Thomas og Espen Halhjem røyner på.

- Gutane liker Halhjem-brørne og hadde nok godt av fysisk fostring og lagbygging. Dei fekk blant anna prøva amerikansk fotball.

- Men denne veka var dei klare for å spela vanleg fotball igjen, det var tydeleg.

Til kvartfinale i fjor
I fjor gjorde juniorlaget til Os det skarpt. I Åttandedelsfinalen knuste dei Fana, som den gong leia serien, 4-0. Men ein jamn kvartfinale mot SEFA Abidjan enda med 1-2-tap (Erik Kanestrøm skåra Os sitt mål).

Spelarar som Preben Borgen, Dani Bergstø, Ramo Racic, Espen Valvik og Martin Eidsvik har blitt senior. Men samstundes har dei faste juniorspelarane blitt både eldre og betre. Det har også juniorane som speler med seniorane blitt.

- Vi får med oss Vegard Leikvoll Moberg, som blir kaptein, Erik Kanestrøm, Baste Jonassen, Mats Lepsøe, Sven Lyssand, Kristoffer Sande og Espen Kopperud frå seniorstallen.

Startar som tilskodarar
Juniorlaget startar Norway Cup med kamp mot det som skal vera Christiano Ronaldo sin moderklubb, portugisiske Uniao måndag 2. august.

- Men vi reiser bort til helga og satsar på å få med oss A-laget sin bortekamp mot Kjelsås sundag ettermiddag. Å støtta seniorane til siger blir fin opplading, meiner Steffensen.

Jenter og gutar
Os stiller som i fjor med to gutelag. I 2009 tapte Os 2 kvartfinalen i B-sluttspelet (0-1 for Åsane), medan førstelaget tapte i siste sekund for Clausenengen i 1/16-finalen i A-sluttspelet.

Gutelaga til Os har i forkant av årets turnering fått omtale på norwaycup.no.

Også jentelaget kom til A-sluttspelet i fjor, men der tapte dei første kamp 0-3.

Søftelendingar med småsøsken
Søfteland sitt jentelag kom til kvartfinalen i B-sluttspelet i fjor. Men medan dei sat og førebudde seg på kamp fekk dei melding om at resten av sluttspelet var avlyst grunna regn og våte banar.

- Vi var sinte og skuffa, og føler at vi reiser til Oslo for revansje, seier trenar Bjørn Mjelva.

Då fleire av spelarane, både på Søfteland, Kalandseidet, Os, Nore Neset - og sørenesingar som speler på Nore Neset, har småsøsken med seg - blei det eit smågutelag av desse òg.

- Vi oppdaga at vi samla sett har ein fin gutegjeng med oss, og fekk meldt dei på no i juni. Det kan bli eit spennande lag. Dei har ikkje sluttspel i den alderen, men speler seks kampar uansett.

For første, siste og tredje gong
Lysekloster stiller med jentelag i Norway Cup for tredje år på rad.

- I år stiller vi sterkt og med mål om endeleg å ta oss vidare frå puljespelet, seier trenar Atle Heggland.

Lysekloster stiller også med to gutelag, for første og kanskje siste gong.

- Dei fleste blir juniorspelarar etter denne sesongen, så det er ikkje sikkert at vi stiller neste år. Men vi ligg på 2. plass i serien, vi har hatt ei fin oppkjøring og har ambisjonar om å koma oss vidare, seier Bjørn Samdal, trenar for førstelaget.

Stor stall frå Nore Neset
Nore Neset, som har vore med i Norway Cup ein gong for nokre år sidan, er no klar for Oslo igjen.

- Vi starta oppkjøringa i førre veke og har hatt godt oppmøte. Stallen er litt i største laget, men med 20 gutar er vi godt rusta for Norway Cup, seier trenar Odd Jarle Hjelle.

Nore Neset rykte saman med Os sitt gutelag opp til gutar elite før sommaren, og har blant anna 2. plass frå Sognefjord Lerum Cup i 2009 på samvitet.

På norwaycup.no kan du lesa meir om arrangementet.