Med 4000 russedressar på lager

Bildeserie:

1 av 2

Hausten 2017 sat kameratane Alexander Tøssebro, Vegard Strønen Skeie, Lars Hadler-Olsen og Harry Moore og diskuterte kor dyrt det kom til å bli å uniformera seg til russetida, og om korleis to firma med same eigar nærmast har monopol på russeutstyr.

Hausten same år sto etablering av ungdomsbedrift på programmet på Os Gymnas, og dei starta Russehuset UB.

Ungdomane frå Os var ikkje åleine om å ha tru på målsetnaden, «det skal vera enkelt og rimeleg å vera russ», eller gjennomføringskrafta. Russehuset UB blei kåra til beste ungdomsbedrift i Hordaland og har seinare fått 40.000 kroner i støtte for etablering av nettbutikk og vore i Oslo for å halda tale på årskonferansen til NHO.

I år har dei stifta aksjeselskap og fylt opp lageret - denne veka blei nettbutikken lansert.

Raskt påfyll til årets kull

Dei fire gründerane er sjølv russ i år. Sitt eige kull har dei ikkje blitt heilt klare til å retta seg mot.

– Det har tatt tid å få alt klart, men ut frå vareprøvar fekk vi inn dei første bestillingane i haust, til vår eigen årgang si feiring våren 2019.

– Vi har selt til éin russebuss og enkelte bilar, i tillegg er det nokre etternølarar som ikkje bestilte i haust, som no er glade for at vi kan levera raskt.

Effektiv drift og låge prisar

For å halda drifta effektiv og prisane låge, har selskapet droppa det meste av tilbehør.

– Vi sel russedressar, russebukser, gensarar og luer. Førebels har vi berre raude dressar på lager. I tillegg har vi nokre få merke som folk kan festa på dressane sine.

Design, produksjon og import av russedressane og buksene styrer dei sjølv, genserane får dei levert, ferdig dekorert med ønska namn, frå ein produsent i Tyskland som dei har fått avtale med.

– Vi har òg fått samarbeidsavtale med eit firma som lager logoar til russebilar. Vi skaffar kundar til kvarandre, og kundane våre får rabatt når dei bestiller via oss.

Tar friår etter gymnaset

Dei fire avgangselevane har fått selskapet i full drift eit lite halvår før dei sjølv er ferdig med tredje år på vidaregåande skule.

– Er de samla også etter at tida på gymnaset er over, at det er lagt til rette for å driva selskapet vidare saman?

– Ja. Eg og Lars skal ha eit friår frå skule etter gymnaset og Harry skal studera i Bergen. Alexander skal i militæret, men hjelper til frå avstand, i den grad han kan, og når han er heime, fortel Vegard Strønen Skeie.

I tida som kjem, parallelt med planlegging av eiga russefeiring, vil selskapet turnera rundt på skulane i området for i rekruttera kundar frå Russ 2020. Samtidig står dei med lager i Os klare til å kle opp dei frå årets kull som ikkje har sikra seg antrekk enno.