Med klokketru på eigne lag

I går blei serien i 3. divisjon avdeling 7 sparka i gang. Brodd tapte 2-4 heime for Hundvåg og Vaulen tapte 0-1 heime for Kopervik.

Men i Osbygda handlar det om derby, storebror Os og veslebror Lysekloster i serieopninga, Battle of bygdo på Kuventræ frå klokka 16 laurdag - truleg til full tribune under strålande sol.

Og Tore Nielsen har slett ikkje tru på heimetap i denne kampen.

– Vi har ein samspelt tropp med fleire som har spelt i lag i mange år. No har vi lagt bak oss mange veker med full tenning på trening og vi er godt førebudd til å ta imot Lysekloster, seier Os-trenaren.

– I tillegg til spelarar som kjenner kvarandre godt og lang erfaring i 3. og 2. divisjon har vi individuelle spelarar med god fysikk og enorm fart.

– Om Lysekloster kjem til oss i kjent stil, full i sjølvtillit og står høgt, risikerer dei å få ekstremt raske angrepsspelarar i retur. Legg dei seg lågt så har vi lang erfaring med å stå høgt og rutinerte og raske forsvarsspelarar til å ta det som eventuelt måtte koma av overgangar.

Utfordrar med innkjørt spelemønster

Også Lysekloster-trenaren fortel om gode treningsveker og full tenning før lokaloppgjeret.

– Vi vinn på at vi er veldig samkjørte og har spelarar som er veldig tru mot eit system som vi har spelt inn over ein lengre periode. I tillegg har vi fleire spelarar med erfaring både frå høgt nivå og viktige kampar.

– Eg trur vi har eit betre lag og at vi vinn denne kampen, seier Thomas Sandal.

– Men det blir nok ein kamp med mange tøffe duellar, mykje kriging og mange dødballar

I Os & Fusaposten onsdag tippa Tore 2-0-siger til Os, Thomas tippa 0-1-siger til eige lag.

Reservekaptein og startellevar

Lysekloster må klara seg utan Ørjan Skilbrei, som er skadd, og Johannes Jordal, som fekk to gule kort i NM-kampen mot Østese.

I Jordal sitt fråvær er Kim Krogsethagen kaptein.

Meir vil ikkje Sandal røpa om kven som speler i morgon.

– Os veit nok om oss allereie, seier han.

Men Nielsen kvir seg ikkje for å fortelja kven som startar og kven han har på benken i morgon:

Os: Anders Kloven - Ørjan Glesnes, Børge Borgen, Per Søgnen Merai, Torkel Hjertnes - Stian Lunde, Tore Valvik - Erik Kanestrøm, Egil Thuen - Preben Borgen - Christer Olsen.
Reservar: Frode Moberg Øvredal, Håkon Kvittingen, Stian Bakke, Glenn Krossøy, Mads Lepsøe og Ramo Racic.