Medvind nord og sør for Os

Det er ferd med å reisa seg eit bustadområde på over 250 hus i Hjellemarka, og Bøe & Lepsøy Utbygging AS kunne førre veke ha kranselag på deira første av planlagte ni trinn.

– Vi heldt kranselag for det vi kallar B5, med servering av pizza og kake i halvannan time midt på dagen, fortel dagleg leiar Steinar Jensen.

Entreprenør Vestafjell møtte mannssterke saman med andre inviterte gjestar og stemninga skal ha vore god.

– Arbeidene er i rute i forhold til at kjøparane skal kunna flytta inn før jul, og alt framstår skikkeleg både i forhold til kvalitet og framdrift, seier Jensen.

Fire sal første dag

Tysdag hadde Bøe & Lepsøy Utvikling første visning på første trinn i B6.

– Det var godt frammøte og veldig god respons, seier Jensen.

Resultatet blei fire sal og to reservasjonar allereie første dag, av til saman 18 husvære i byggetrinnet.

– Dette er vi veldig nøgd med i det som er eit heilt nytt felt. Det ser ut som om folk set pris på naturen, det fine turterrenget og vassdraget i nærleiken, i tillegg til at avstanden ikkje er stor til verken Søfteland skule eller Os sentrum.

Ny runde på Lekven

Parallelt med bygge- og salsaktiviteten i Hjellemarka er Bøe & Lepsøy klare for å reisa eit nytt leilegheitsbygg på Lekven, Livet på Lekven, med 25 husvære.

– Desse la vi ut for tre veker sidan og også der har interessa vore bra.

Tre husvære er til no selt i Lekven II og to er reservert.