To menn meldt for ulovleg jakt

Laurdag morgon fekk politiet varsel om ulovleg jakt i terrenget rundt Strandafjellet ved Bogstrand.

Tipset gjekk ut på at det var to middelaldrande menn.

– Jegerane var på jakt på privat grunn, og mangla jaktrett på denne staden, seier politioverbetjent Atle Birkeland.

Oppdatert 18. november:

Dei to jegerane, som begge er frå Bjørnafjorden kommune, hevda dei jakta på rev.

Vi siterte først politiet på at jegerane hadde våpen til storviljakt, ikkje revejakt, noko som har skapt reaksjonar. Du har lov å skyta rev med rifle.

– Det er ikkje våpena åleine som skapte denne mistanken. Det er fleire faktorar, blant anna forklaringa på staden, presiserer Birkeland i dag.

Det blei òg opplyst at dei to mangla både jaktkort og våpenkort. Ein mann som seier han er ein av jegerane, har kontakta Midtsiden-redaksjonen og sagt at dette ikkje stemmer. Begge har våpenløyve og våpenkort.

– Det stemmer at det ikkje blei tatt beslag i noko våpen, seier politiet.

– For han eine sin del, var patruljen i tvil. Om dei har løyve og gyldig våpenkort er no opp til våpenkontoret i Odda å avgjera, seier Birkeland.

Roa ned rånarar

Fredag kveld fekk politiet varsel om råning og støy frå fleire køyretøy ved Lidl-bygget.

– Vi rykka ut og møtte på 15 køyretøy på staden.

– Dei fekk oppmoding om å køyra forsvarleg, avsluttar Birkeland.