Merka ikkje brannen
Tre personar var i huset medan flammane sto opp frå taket.
Litt før midnatt veslejulaftan, klokka 23.43, kom melding om brann i ein bustad i Håvardsvegen på Haugland.
– Vi rykte ut med fullt mannskap, seier varabrannsjef Arne Monsen.
Det var ein nabo som varlsa om brannen. Då sto det flammar opp frå taket på huset, som ein ung mann leiger hos ein annan nabo.
– Han som bur i huset hadde to kameratar på besøk. Dei merka ikkje brannen før naboen kom og varsla, fortel politiførstebetjent Audun Hadler-Olsen.
Prøvde å sløkja sjølv
Dei tre prøvde å sløkja sjølv før brannvesenet kom fram, men pulverapparatet var ikkje nok.
– Vi fekk sløkt brannen raskt, men eg eg frykta ei stund at den hadde spreidd seg til blindloftet, seier varabrannsjefen.
No er det gjort grundige undersøkingar på staden og det skal ikkje vera fare for at noko ikkje er sløkt.
Ikkje pipebrann
Årsaka var verken elektrisk anlegg eller pipebrann.
– Dei som bur i huset hadde fyrt i omnen. Ein teori kan vera at glør frå pipa har blitt kasta inn under ein takstein i denne vinden vi har i kveld.
– Men årsaka er førebels uvisst, seier Monsen.