Itzel mista faren sin for to månadar sidan. – Aurora-konserten var meir enn ein konsert for meg, seier ho. (Foto: Privat/Lilly M. Grønvigh)
Itzel mista faren sin for to månadar sidan. – Aurora-konserten var meir enn ein konsert for meg, seier ho. (Foto: Privat/Lilly M. Grønvigh)

Mexicanske Itzel hadde fleire grunnar til å sjå Aurora

– Eg trengte noko nært og kjært på tampen av eit tøft år, milevis frå heimbyen min.

Kjetil Vasby Bruarøy
23. desember 2019 - 11:07

Itzel Aguilar (24) er frå Oaxaca, ein by sør i Mexico som ho skildrar som fargerik og fylt med kultur, i ein familie som er veldig glad i musikk.

Då ei venninne i 2015 tipsa Itzel om Aurora, blei ho umiddelbart ein stor fan.

– Den første låten eg høyrde var Running with the Wolves, og eg blei forelska i musikken hennar frå første stund! Eg synest stemma hennar er magisk, og energien ho utstråler er «amazing»!

Itzel seier ho liker all musikken til Aurora, men om ho må velja nokre favorittlåtar ramsar ho opp The SeedForgotten Love og Animal.

Ville sjå Aurora på hennar heimebane

Etter å ha søkt og venta på å sjå Aurora live i Mexico, fekk Itzel sjansen til å studera eit år i Belgia.

– Hovudårsaka til at eg ville til Europa er at det ikkje er så trygt å vera kvinne i Mexico. Dessutan liker eg å reisa.

Men då ho kom seg til Europa, var Aurora i Asia.

– Endeleg kom Aurora tilbake! Og då eg såg at ho ikkje berre skulle spela i Noreg, men i si eiga heimbygd, var det klart at det var der eg ville oppleva Aurora live for første gong!

• Les omtale av konserten i Oseana fredag

Itzel studerer for å bli ingeniør i miljøteknologi, og trur det er ein av grunnane til at The Seed er blant favorittlåtane.

Frå teksten til The Seed:
You cannot eat money, oh no
When the last tree has fallen
And the rivers are poisoned

Ein god slutt på eit tungt år

– Det var pappa som lærde meg å elska musikk, og musikk har blitt ein viktig del av livet mitt. Musikk kan forvandla eit enkelt øyeblikk til eit magisk øyeblikk.

Men dette året har vore tøft for Itzel. 

– Eg mista den viktigaste personen i livet mitt, helten min, min eigen far, etter at han hadde lagt fleire månadar på sjukehus.

Nokre veker seinare var ho i Belgia, åleine, omringa av en annan kultur, eit anna vêr og eit anna språk.

– Denne konserten var meir enn ein konsert for meg - eg ville avslutta dette året med noko nært og kjært. Stemma hennar var det einaste som heldt meg med selskap på lange, einsame netter på sjukehuset. Aurora sin musikk tok meg heim.

– Det er dette eg elskar med Aurora. Ho spreier denne kjensla av fred, kjærleik og komfort, musikken hennar er ein stad å flykta i tunge stunder.

Itsel hadde ambisjonar om å få møta Aurora for eit bilde saman før eller etter konserten, men forstår at ho er ei så stor stjerne at det er vanskeleg å koma tett på.

No er ho glad og takksam for opplevinga i Oseana.

– Dette blir eit minne for livet! Eg vil takka Aurora for musikken hennar, for energien hennar og for kjærleiken ho spreier! Takk for at du er dette unike mennesket!