Mikal Leigland (Sp) ligg an til å bli varaordførar i Bjørnafjorden kommune. (Foto: Kjetil Vasby Bruarøy)

Mikal Leigland (Sp) blir varaordførar

Bjørnafjorden Senterparti har funne ny kandidat til varaordførarvervet i Bjørnafjorden kommune.

Av: Kjetil Vasby Bruarøy

Bjørnafjorden Senterparti sine komande kommunestyregruppe har blitt einige, Mikal Leigland blir partiet sin varaordførarkandidat.

– Eg stiller, sjølv om eg ikkje er heilt komfortabel med å vera noko vara, seier ein lattermild Leigland til Midtsiden.

Gruppa blei einige i møte torsdag. Endeleg avgjerd kjem når nytt kommunestyre får konstituert seg.

– Førebels er eg berre ein kandidat, presiserer han.

Familietradisjon

I Fusa har han vore medlem av formannskapen og leiar for nokre andre utval, men aldri hatt varaordførarverv. Det har derimot faren hans, Sigmund Leigland, som var varaordførar for ei samlingsliste.

– Mor mi var rask i replikken, og så venninnene hennar gratulerte ho med mannen sitt nye verv, så takka ho, men la til «det er ikkje noko særleg å bu med ein varamann».

Går vi endå ein generasjon opp, til bestefaren som Mikal er oppkalla etter, så finn vi ein erfaren ordførar. Mikal Leigland var ordførar i Strandvik, den gong bygda var eigen kommune, for Venstre i 18 år (1920-1938).

Verdifull tid

Bjørnafjorden Senterparti gjorde eit brakval 9. september, opp frå 27,2 til 39,4 prosent i Fusa, ei tredobling frå 4 til 12 prosent i Os. I alt for Bjørnafjorden kommune landa dei på 15,1 prosent, blei tredje største parti og fekk 5 mandat i komande kommunestyre.

Valet av varaordførarkandidat sto mellom desse fire: Mikal Leigland, Herborg Irene Borgen Nordtveit, Peter-Hans de Zwarte og Terje Sperrevik.

Mikal Leigland eig 100 prosent av konsernet Leigland AS, som igjen eig blant anna Leigland Bygg. Leigland AS omset for nesten ein milliard kroner i året (750 millionar i 2018, 824 i 2016).

– Korleis er det for ein mann med så store verdiar, og så mykje ansvar, å ta på seg oppgåva med ein ein deltidsjobb i politikken?

– Det var ikkje dette som var planen min i utgangspunktet, men når du stiller til val og partiet får ein sånn respons som vi fekk, så må du stilla opp og prøva å gjera ein god jobb.

Ved sidan av partiet sin gode oppslutnad var Mikal Leigland blant dei fire politikarane i Bjørnafjorden som fekk flest personlege stemmer, heile 467 personstemmer og 97 slengjarar.

Overtar plassen som Lekven skulle ha

I forhandlingar med dei andre fire partia, i opposisjon mot Høgre og Frp, blei det avtalt at Sp får både varaordførar og leiar i plan og bygningsutvalet, mens største parti i komande posisjon, Arbeidarpartiet, får ordføraren, ved Trine Lindborg (Ap).

Senterpartiet sin ordførarkandidat Harald Lekven var innstilt som varaordførar, men trekte seg. Lekven blir sitjande i komande kommunestyre, men som uavhengig kandidat.

Leigland legg ikkje skjul på at han helst ville sett Lekven sitja i varaordførarstolen, men tar oppgåva på alvor.

Fleire saker