Mista alt i brannen - takkar bygda for hjelp

I 22.45-tida nyttårsaftan oppdaga politiet at ein leilegheit i Prestegardsskogen var fylt med røyk.

Dei som bur i husværet, ei ung kvinne og tre små born, var ikkje heime.

Flammane blussa opp då røykdykkarane tok seg inn. Brannen blei raskt sløkt, men husværet er nedsota og framleis stengt av.

Politiet mistenkte umiddelbart at brannen var påsett. Ein mistenkt i midten av 20-åra, som tidlegare på dagen skal ha kome med trugslar mot kvinna, blei pågripen etter kort tid.

På bar bakke

Kvinna og borna hennar flytta inn i husværet i haust. Ho er glad for at ho var forseinka heim, at ingen blei skadd i brannen, men trist for at ho ikkje hadde tatt seg tid til å teikna innboforsikring.

– Alt vi eig var i huset, det einaste vi hadde med oss var kleda vi gjekk i og ein bag med nokre bleier i.

Ho kom til staden kort tid etter brannvesenet. Ho var sint, fordi ho meiner brannen kunne vore hindra. Politiet blei varsla om trugslane fleire gongar i løpet av dagen. Dette kjem Midtsiden tilbake til i eiga sak over helga.

Etter samtalar med politiet nærma klokka seg midnatt. Så kom fyrverkeriet.

Sjølv om kvinna var frustrert, såg ho ironien i det. Nytt år, og bokstavleg tala blanke ark.

Rørt over støtta frå kjente og ukjente

Kvinna og ungane overnatta ho familie nyttårsaftan, og har no fått ein midlertidig stad å bu.

Om noko kan reddast frå husværet, veit ho ikkje. Noko hermetisk barnemat som låg i vogna i gangen blei henta ut av brannvesenet, men denne var øydelagt. Ho er i dag fortvila over at ho ikkje hadde innboforsikring. Familien leiger husværet. Om huseigar sin forsikring dekker noko, er foreløpig uvisst.

– Eg ba Nav om hjelp, og fekk 3000 kroner. Pengane kjem godt med, men eg utfordra saksbehandlar ved å be ho ta med seg pengane og kjøpa klede til alle oss fire. Helst også ytterklede, så ungane kan gå i barnehagen. Det blei ikkje godt mottatt.

Men så oppdaga kvinna og familien eit omfattande engasjement.

– Venar og kjente har involvert seg, men det har også folk vi knapt kjenner! Vi har mottatt fleire sekkar med klede, nokre har kome med litt pengar, fleire butikkar på Amfisenteret har donert klede og soveputer, og ei venninne har starta ein innsamlingsaksjon, fortel faren til den unge kvinna.

– Det kostar å erstatta klede og utstyr til ein familie på fire. Vi er rørte over korleis bygda stiller opp, og svært takksame for hjelpa i denne vanskelege tida.