Mopedførar til sjukehus etter kollisjon

Onsdag klokka 19.05 fekk politiet melding om eit trafikkuhell mellom bil og moped.

Uhellet skjedde på Strønevegen, i krysset mellom Nordstrøno og Sørstrøno.

– Mopedførar, ein gut fødd i 2005, var allereie frakta til Haukeland då patruljen vår kom til staden. Skadeomfang er ukjent, opplyser politioverbetjent Anne Lyssand.

Bilførar, ei kvinne fødd i 1974, blåste til null i promille. Ho og passasjer reiste for eiga hand til legevakt for sjekk.

– Kvinna forklarte at ein bil skal ha stoppa i krysset, men at mopeden køyrde på utsida av denne bilen og trefte baksida av hennar bil.

– Eg har ikkje oversikt kven som kom frå kva retning, men patruljen har notert at det framstår som at mopedførar hadde vikeplikt, seier Lyssand.