Os - Erdal KM-finale 2016

Munter KM-finale for Os oldboys

VIDEO: Sjå alle skåringane då Os oldboys spelte KM-finale mot Erdal på Kuventræ.

image
image
Av: Kjetil Vasby Bruarøy

I fjor trengte dei berre å stilla opp for å vinna KM-finalen, motstandar Mathopen møtte ikkje i fram.

I går var det KM-finale på heimebane mot Erdal, eit av få lag som har gjeve Os motstand dei siste åra. Og finalen blei i grenseland til spennande.

Erdal tok leiinga før Os gjekk opp i 4-1.

Men så reduserte Erdal til 4-2 og 4-3 før regjerande kretsmeistarane drog ifrå igjen.

Tommy Hjelle skåra det første og det siste målet, yngstemann Tim Henrik Sperrevik hadde tre assist og skåra 5-3-målet.

Laget, som no har vore kretsmeister 15 av dei siste 20 åra, dediserte finalen til lagleiar Stig Morten Bruarøy, som skal bli pappa i desember.

Bruarøy sette sjølv inn 6-3 og feira med å ta av seg trøya. Også i oldboys kvalifiserer dette til gult kort, (ikkje raudt, som enkelte ville foreslått). Dommar Frode Wold, som dømte sin første oldboys-kamp, delte ut kortet, Stig Morten tok imot med eit smil.

Os - Erdal 7-3 (4-2)
Målskårarar, Os: Tommy Hjelle 2, Robert Bjørnevik 2, Arve Solskjær, Tim Henrik Sperrevik og Stig Morten Bruarøy.
Os: Tor Mogens Jentoft - Eirik Hjørnevik, Arve Solskjær, Rune Klett, Tommy Hjelle, Robert Bjørnevik, Frode Øye, Tim Henrik Sperrevik, spelande trenar Stig Morten Bruarøy og spelande assistenttrenar Leif Erik Solbakken.

I videoen over ser du alle skåringane bortsett frå Erdal si 4-3-redusering på straffe.

122 mål på 13 kampar

Os har vore suverene i år og vunne 12 av 12 seriekampar, 6 i vår, 6 i haust.

Før gårsdagens finale sto dei med imponerande 115-21 i målforskjell.

Etter finalesigeren kan Os notera seg med 122 - 24, irriterande 2 i frå 100 plussmål.

Stor og god gruppe

– Vi måtte klara oss utan haustens toppskårar Jan Frode Skeie, som er i Kina. Vårens toppskårar Jørn Vegar Berge har vore skadd sidan i mai. Keeper Vidar Hjelle er skulderoperert etter ei formidabel redning mot Sædalen i vår, men her har vi Mogens som godt alternativ, fortel Solbakken.

Os har ein snittalder på 45, med Tim Henrik Sperrevik (40) som yngstemann og fleire spelarar fødd i 1960 (56 år).

– Vi må heller ikkje gløyma Edvin Carlson, som flytta til Sotra og ikkje har fått trent så mykje, og Morten Døsen, som har skadd hæl og litt dårlig kondis, men som heldigvis steppa inn som coach i finalen.

Solbakken takkar òg andre treningskameratar, oldboysen er på det meste oppe i 20 på trening, og støtteapparatet, med Frode Heggland i spissen.

Vil ha revansje på Voss

Til helga som kjem reiser oldboysen til Voss og Smalahovecup.

Her har osingane lange tradisjonar som vinnar av både festen av fotballcupen, men i fjor blei det finaletap for vertsklubben sitt lag, som ifølgje osingane var ganske identisk med Voss sitt A-lag.

Os oldboys 2016: Tor Mogens Jentoft, Eirik Hjørnevik, Arve Solskjær, Rune Klett, Tommy Hjelle, Robert Bjørnevik, Frode Øye, Tim Henrik Sperrevik, spelande trenar Stig Morten Bruarøy og spelande assistenttrenar Leif Erik Solbakken - Tryggve Moberg, Vidar Hjelle, Jan Frode Skeie, Frode Heggland, Jan Terje Lund, Chris Drange, Morten Døsen, Jørn Vegard Berge, Knut Eirik Drange, Arvid Søvik, Ingar Asbjørn Endresen, Kjell Morten Søvik, Erling Gullbrand Olsen, Eivind Carlson, Tore Borgen og André Herfindal.

Fleire saker