Steppin' Out - Solstrand - 2019

Musikalsk handverk på Solstrand

Omtale, video og bildeserie: Torsdagens konsert med Steppin’ Out vart ein herleg miks av gammalt og nytt.

image
image
image
image
image
image
image
image
image
image
Av: Kjetil Osablod Grønvigh

Annonsert som eit vårleg eventyr, og det på Solstrand. Firkløveret som utgjer bandet, Jan Haaland, Kristine Bjånes, Knut Vidar Garlid og Nils Midtseter hadde lagt hovudet godt til rette på blokka - ville det koma folk, og ville dei skjemma seg sjølv eller hotellet ut?

Solstrand Hotell & Bad er tross alt på topp blant landets beste hotell - kvart år.

Borgasalen er meir enn berre kongress

Konserten gjekk av stabelen i Borgasalen, eit stort rom som til dagleg minnar mest om ein ekstra flott kongressal. Men, skru ned lyset, set opp stolar og hiv ut borda, og vipps du har eit lokale godt eigna for konsertar. Store lysekroner i taket er det ikkje alle konsertsalar som kan skryta på seg.

Kveldens kaptein på lyd, Arthur Håkon Botnevik, leverte med stødige øyre ei rettvis fordeling av orkesteret, og det treng ikkje vera høgt for at det skal vera bra. (Og det kjem frå denne artikkelforfattaren!)

Solstrand var ikkje berre på tilbodssida med å la Haaland med mannskap få gjennomføra ein draum med å ha konsert på Solstrand. Frå publikum gjekk inn hoveddøra vart dei teken i mot slik berre Solstrand kan gjera det.

Sjå førehandsomtale med akustisk song ved Solstrand sin kai

Konsert med alle - for alle

Sjølve konserten var i to delar. Det er ikkje alltid at ein pause på 20 + minutt er den beste investeringa du kan gjera for å halda på interessa til publikummet ditt, men på torsdag funka det. Publikum var på plass att fem minutt før avtalt tid. Det seier noko om respekten mellom orkester og publikum.

Publikummet var av det godt vaksne slaget. Eller som Haaland sjølv sa det: «Oi, her var det mykje kjentfolk!». Det heile var nok mest ein einaste stor venefest, med kortreist musikk til.

Nøysam briljering på høgt plan

Innhaldsmessig tok orkesteret, for kvelden utvida med Tormod Bjånes på bassgitar, Arvid Aasprang på saksofon og Steinar Lyssand på gitar sats og hoppa ut musikkens ulike sjangrar og tidsperiodar.

Om det skal nemnast ein raud tråd, må det vera at i løpet av konsert fekk kvar av musikantane lov til å briljera litt ekstra. Då Steinar «Lightsand» Lyssand spelte låta «Crows» på debutplata si, med Steppin’ Out som backingband, var det godt over grensa til magi på Solstrand.

Kristine Bjånes syng flott like lett som andre tek på seg skoa, og sjølv om Jan Haaland til tider ser litt overraska ut over at han er på ein scene, (litt sånn som Aurora òg er mellom låtane), tek han full kontroll på rommet med ein personleg og karakteristisk vokalbruk.

Heile opplevinga vart festa saman med noko av det sterkaste musikalske limet du finn i Os; kapellmester Knut Vidar Garlid på tangentar, og Nils Midtseter på trommer og perkusjon.

Høgdepunkt under konserten?  Ein rå versjon av Gnarls Barkley sin «Crazy».

Fleire saker