Jul hos familien Sæbø Neset

Musikarfamilie i julestemning

VIDEO: Ekteparet og musikklærarane Anne Leni Søfteland Sæbø og Terje Neset har alle dei musikalske borna heime i jula. Sånn høyres det ut.

Av: Kjetil Vasby Bruarøy

Saksofonist Marius Neset er heime i Os i jula. Korleis høyres det ut når Marius, saman med søstrene Ingrid, som speler fløyte og studerer ved Det Kgl. Danske Musikkonservatorium, og Anna, som er vokalist, og utdanna musikklærar, kjem heim til foreldra, musikklærarane Anne Leni og Terje?

SJÅ VIDEO NEDST I ARTIKKELEN

– Vi speler ofte saman, men som oftast to og to, om det er noko spesielt vi øver på eller liknande.

– Men når vi har besøk, eller er i besøk, så blir det ofte heile familien i sving med kvar sine instrument, seier Ingrid.

Fredag var alle fem samla og Midtsiden var på besøk. Det var godt nok til at heile familien samla seg rundt pianoet og framførte julelåta "Angel we have heard on high".

Med venteliste

Anna og venninna Janie Froestad Laupsa var nyleg omtalt på Midtsiden då dei i haust fortalte om ei ny showgruppe dei vil starta på Nore Neset.

– Vi har hatt veldig god respons på tilbodet.

– I den yngste gruppa har vi fleire på venteliste og det er allereie 16-17 påmeldte til det eldste partiet, seier Anna om kurset som startar i januar.

– Trivst i Danmark

Veslesøster Ingrid er halvvegs i tredje året ved musikkonservatoriet i København.

Før ho reiste heim hadde ho éin eksamen og Ingrid tok med seg toppkarakteren 12 heim til Søfteland.

– Eg bur med kjærasten min cirka fem minutt sykkelavstand frå Marius, fortel Ingrid.

Ho seier ho trivst godt i den danske hovudstaden. 

Med på storebror si neste plate

Storebror Marius har blitt buande i København etter han var ferdig utdanna med både mastergrad og toårog solistutdanning.

I haust har han jobba med si tredje soloplate, "Birds". Den første blei av The Guardian kåra til «Album of the Year».

– Plata er no ferdig og Ingrid er med på 4-5 av låtane, fortel Marius om "Birds", som skal sleppast i mars 2013.

Travel vinter og vår

I tillegg til jobbing med albumet har Marius komponert for Oslo Sinfonietta, som han sjølv skal vera med å framføra på Operaen i Oslo i mars.

– Men først blir det ferie i USA, New York, Miami og New Orleans. I slutten av januar skal eg til Nordlysfestialen, då er også Ingrid med meg, fortel Marius.

Marius skal også spela på VossaJazz og under Festspillene i Bergen, i tillegg til at han i vår skal på releaseturné for "Birds" med bandet sitt i store delar av Europa.

Å avla musikarar ...

Det er mange som veks opp i musikalske heimar, og blir flinke nok på gitar eller piano til å spela på pub, eller til og med ha suksess åleine eller med band.

Men korleis har det seg at alle Terje og Anne Leni sine tre ungar ikkje berre speler fleire instrument, men tar høgare utdanning innan musikk og utmerkar seg på sine område.

– Det var faktisk sånn at då yngstejenta Ingrid skulle velja, så håpte vil litt på at det skulle bli noko anna enn musikk, seier Terje og ler, halvvegs på spøk.

Sjølv seier Ingrid at det har vore naturleg for ho å gå vidare med musikk som fag.

– Det er i alle fall ikkje sånn at eg har følt noko press. Då eg var lita jente sat eg og såg på at mamma hadde pianotimar heime og seinare har vi spelt i lag.

– Å vera musikar kan vera ein tøff retning å gå, men vi har støtta alle tre i sine val og vi synes sjølvsagt det er kjekt at dei har blitt så glade i musikk, seier Anne Leni.

Både Terje og Anne Leni har søsken som også er musikalske. Derfor blir det ekstra mykje speling i lag i jula.

VIDEO: Midtsiden inviterte seg sjølv på besøk til Sæbø Neset fredag før jul, og vi fekk familien til å spela ei julelåt saman.

Med "Angel we have heard on high" ønskjer vi alle lesarane våre ei god og fredeleg jul! 

Fleire saker