– Mykje bleik hud blir blotta denne helga

Draumevêret til pinse kom som varsla, vi har skyfri himmel og rundt 20 gradar. Det er eit yrande liv på sjøen, og og fleire har allereie kasta skjorta for å nyta forsommaren maksimalt.

– Det er godt med sol og påfyll av D-vitaminar, seier Sigbjørg Eriksson i Bjørnafjorden kommune.

Fredag åt ho lunsj ute i sola med kollegaene Bjørg Sjøbø, som er tryggleigssjukepleiar, og avdelingsleiar Kristin Almås.

– Men sjølv om det ikkje akkurat er middelhavstemperatur så fortener kroppen både pause frå sola og solkrem i desse dagar,

Sidan slutten av 2012 har ho jobba som kreftkoordinator i Os, og held fram i same stilling i den nye eininga «helsefremjing og rehabilitering» i ny storkommune.

• Les òg: Fekk hjelp i sorga

Normalt ville ho markert hudsjekkdagen i mai, men den blei avlyst grunna koronakrisa.

– Det er ulike typar hudkreft. Alle kan krevja behandling, og nokre av dei kan vera livstrugande.

Anbefalt tid i sola i dag: 30-60 minutt

– Mange av oss har vore mykje utandørs denne våren, og fått gradvis beskyttelse i ansiktet. Når temperaturen no aukar, og folk kler seg lettare, er det mykje vinterbleik hud som får sol på seg.

Risikioen for å bli solbrent aukar, og kvar gong du blir brent aukar risikoen for at du seinare skal få hudkreft.

• Les òg: 1000 osingar har kreftdiagnose

– UV-strålinga kan vera høg sjølv om det «berre» er 20 gradar ute.

Ifølgje yr.no sitt UV-varsel er det sterk stråling på Vestlandet i dag. Ved sterk stråling (oransje nivå) er det anbefalt å vera maks 0,5 til 1 time i sola.

«Bruk klede, solhatt og solbriller. Ta pausar frå sola mellom klokka 12 og 15. Bruk solkrem med høg faktor og vern mot UVA-stråler» skriv Yr.

– Sjølv vaks eg opp utan solkrem, Spenol var tingen. Så kom Hawaiian Oil med faktor 2, som vi i ungdomen fnyste av og syntest var for høg faktor. Bruk frå faktor 30 og oppover, smør deg før du går ut, fyll på i løpet av dagen og ta pausar frå sola, anbefalar Sigbjørg.

• Les 4 solråd og 10 fakta om solkrem på kreftforeningen.no