Mykje folk - lite bråk

Politiet fann nesten ingeting å reagera på då dei patruljerte Os sentrum på det som er ein av dei mest livlege kveldane i året.

– Det skal ha vore fullt hus på Catten og mykje folk også på Liens og Baronessen. Også nattopen 7 Eleven og nattopen Esso hadde godt besøk, les operasjonsleiar Knut Dahl-Michelsen frå loggen.

– Men Catten hadde heile 15 vaktar på jobb, i tillegg prioriterte politiet på Os å vera synleg i gatebildet. Nokre typiske bråkmakarar blei visst observert, men det var verken tillaup til slåsting eller folk som måtte visast vekk frå sentrum.

Det einaste politiet fann å setja fingeren på, var ein mann som drakk øl på offentleg stad.

– Det er notert at vedkomande var høfleg og audmjuk, og at han slapp unna med ei åtvaring.

Denne åtvaringa var ein julepresang verdt rundt 4000 kroner.