Nær siger over Voss

Bildeserie:

1 av 9

Voss har kjempa heilt i toppen av 3. divisjon fleire år på rad. I dag var det andrelaget til Os som fekk bryna seg på vossingane, og Os 2 var nok nærmare siger enn gjestane.

Kampen enda 0-0. Os 2 står med 7 poeng etter 4 rundar.

- Vi var godt organisert, heldt oss til 4-3-3 framover og 4-5-1 då vi mista ballen, som avtalt. Sjølv om vi ikkje sette sjansane våre kan vi vera nøgd etter dagens kamp mot ein slik motstandar, meiner trenar Tore Nielsen.

Jamn førsteomgang
Os 2 og Voss hadde om lag like mange angrep i første omgang, begge utan å skapa dei store sjansane. Voss kom til ein del innlegg frå sin venstrekant, Os var i starten nærmast på nokre dødballar på øvre banehalvdel.

- Eg synes Christer, som spelte nesten heile kampen på topp, gjorde det veldig bra i dag, seier Nielsen.

Olsen viste stor appetitt framfor mål, og brukte mykje krefter på å skapa farlege situasjonar for motstandaren.

Buvik var ein god dirigent på sentral midtbane medan Christian Almeland fekk det tøft mot ein fysisk sterk venstreback på Voss.

Best mot slutten
Andre omgang blei litt lik førsteomgangen, men dei siste ti minuttane byrja det å skje litt meir. Erik Kanestrøm og Ramo Racic såg ut til å lika å få Espen Valvik på banen, og dei tre skapte mykje på Os sin venstrekant.

Også Martin Eidsvik kom innpå som eit friskt pust på høgrekant, fungerte fint saman med høgreback Anders Glesnes, og var nær på målgjevande etter å ha rista av seg vossabacken og servert eit fint innlegg til Kolås.

Glesnes, som har ein god dødballfot, bør ikkje undervurdera verdien av eit godt innlegg. I dag blei det litt for mange forsøk på å skåra frå distanse medan boksen var full av kameratar som sto klare til å skåra. Høgrebacken er også trygg med ballen i beina og klarar stort sett å koma seg laus for å få lagt inn.

Algrøy-comeback
Einar Algrøy, som i vinter la opp grunna ny turnus på jobb og planar om husbygging, er allereie tilbake.

- Eg har fått normal arbeidstid igjen, og vi ventar litt med å bygga hus, fortel Einar.

Midtstopparen har vore i trening med Os i to veker og spelte i dag sin første kamp for sesongen.

- Eg har ikkje trent fem dagar i veka medan eg har vore vekke, men eg har halde meg i form og synes var godt å vera tilbake på Kuventræ.

Os sitt lag (4-3-3): Kjetil Hansen, Anders Glesnes, Einar Algrøy, Per Søgnen Merai, Mats Lepsøe, Espen Kolås, Frode Buvik, Erik Kanestrøm, Christian Almeland, Christer Olsen og Ramo Racic.
Byte: Espen Valvik for Olsen, Martin Eidsvik for Almeland og John Ole Johannessen for Kolås.

Os 2 ligg med 7 poeng på 5. plass på tabellen, tre poeng bak Fyllingen, a-poeng med Odda og Voss på 3. og 4. plass. Øystese ligg på 2. plass med 9 poeng.

SJÅ TABELL