NÆRINGSNYTT: Nye butikkar, store planar – og ein brå stopp
VEKE 10: Utbygging kan gi utvikling, og rom for nye tenester. På den negative sida kan store prosjekt føre med seg ulike former for risiko og konsekvensar. I denne utgåva av Næringsnytt får du eksempel på begge delar.
Velkomen til nyheitsbrevet Næringsnytt – ei litt annleis oppdatering enn ein vanleg artikkel.
Kvar veke deler eg, journalist Marie Kroka, utvald næringslivsstoff med deg.
Om du vil sikre deg innblikket levert til eigen innboks, kan du opprette gratis abonnement på nyheitsbrevet her.
Clas Ohlson opnar om to veker
Førebuingane til opninga av den nye Clas Ohlson-butikken på Thon Senter Os er i sluttfasen. Butikken er på 1.049 kvadratmeter, og 12 personar har fått jobb i den nye avdelinga.
Under førebuingane denne veka deltok konsernsjef Kristofer Tonström i arbeidet med å få varer på plass i hyllene.
Tonström viser til at butikkane i nærområdet har gode tal, og at kjeda har tru på at den nye butikken på Os vil gjere det mogleg for fleire å handle lokalt.
Stans i vegprosjekt etter konkurs
Tysdag ettermiddag blei det kjent at entreprenørselskapet Bertelsen & Garpestad AS har meldt oppbod. Dette fører til at arbeidet på fleire vegprosjekt i fylket stanser opp, inkludert utbygginga i Hatvikvegen.
Kontrakten i Hatvikvegen har ein verdi på 102 millionar kroner, og det er no uvisst når arbeidet kan starte opp att.
Samstundes som maskinene blir fjerna frå anlegget, står seks husstandar i området med krav om erstatning etter vasskadar. Naboane opplyser at dei har fått vatn inn i kjellarar og skadar på grunnmurar i samband med anleggsarbeidet.
– Vi ligger og kvir oss kvar gong det regner, seier naboane.
Fylkeskommunen skal no vurdere krava juridisk etter at hovudentreprenøren er konkurs.
Parkeringshus og nærbutikk i planleggingsfasen
Kommunen har no mottatt eit prisestimat på det etterlengta parkeringsanlegget i fjell på Osøyro. Multiconsult har rekna ut at prosjektet vil koste om lag 911 millionar kroner.
Kommunedirektøren tilrår at kommunen søker etter private aktørar som kan finansiere, bygge og drifte anlegget for å unngå auka kommunale låneopptak.
I Øyane blir det arbeidd med å sikre vidare butikkdrift.
– Vi må få ny marina på plass. I tillegg vil vi pusse opp huset, seier styreleiar i Øinæs grunneigarlag, Jon Harald Røttingen.
Han opplyser at vedlikehaldsbehovet blir vurdert som handterbart av medlemmar med byggfagleg kompetanse.
I ekstraordinært årsmøte 9. mars vil medlemmane ta stilling til planar og eventuelle tilbod frå nokon som kan drive butikken.
Dette er nokre av døma på korleis utvikling i næringslivet både kan skape nye tilbod – og nye problem å løyse.
På gjenles neste veke!
Beste helsing
Marie Kroka
Journalist
