NÆRINGSNYTT SOMMARUTGÅVE: Juli blei bygd på dugnad, draumar og godt humør

Velkomen til nyheitsbrevet Næringsnytt – ei litt annleis oppdatering enn ein vanleg artikkel.

Om du vil sikre deg innblikket levert til eigen innboks, kan du opprette gratis abonnement på nyheitsbrevet her.

Sommarstart i fjøra

Juli starta med sol, bading og krabbejakt i Tellevika.

Etter ei omfattande opprusting har friluftsområdet fått ny plen, nye stiar, toalett, grindverksbygg, fellesgrill og betre tilkomst til kai og svaberg.

Då anleggsgjerdet blei fjerna og toalettet opna, tok det ikkje lang tid før badegjestane kom.

Karoline Hjelle og Anne-Lise Aspenes hadde med seg fleire barnebarn.

– Vi driv BFO, bestemorfritidsordning, sa Karoline.

Ungane hadde nok å gjere i fjøra.

– Det er tydelegvis mykje krabbar her, og dei har vel ikkje blitt fanga på nokre år, sa ho og lo.

Les ògNøgde krabbefangarar i nyopna Tellevika

Samarbeidet mellom kommunen, Bergen og Omland Friluftsråd og bustadutviklar har gitt bygda ein ny møteplass ved sjøen – med plass til både rullestol, barnevogn, morgonsol og regnbyer under tak.

Frå draum til butikk på to månader

Mens nokre fann feriero i Tellevika, hadde Trygve Berentzen og Mateusz Jachimczak knapt tid til å trekke pusten.

Berre to månader etter at ideen om Rett Mat blei presentert, opna dei butikk i Irisgården.

Les ògOpningshelg med handplukka varer og handlaga innreiing

Her sel dei mat frå lokale og andre utvalde produsentar. I hyllene ligg mellom anna lammekjøt frå Bø, brød frå Kuventræ og poteter, agurk og grønkål frå Lysekloster hovudgard.

Også innreiinga har fått eit kortreist og personleg preg. Mateusz bygde disken sjølv, medan dei to snekra hyllene av treverk henta i Hardanger.

– Mateusz ville at vi skulle ha ei innreiing som matcha varene, og fekk viljen sin, fortalde Trygve.

Opningsdagen blei travel. Nysteikte brød forsvann i løpet av dei første timane, og hyllene måtte fyllast på undervegs.

Det som i utgangspunktet var ein draum om ein framtidig butikk, har allereie blitt ein butikk med ope sju dagar i veka.

Valde heimebane

Juli baud òg på folkefest i Vognhallen.

Då minst 800 menneske skulle sjå VM-kvartfinalen mellom Norge og England, stilte eit heilt lag av frivillige opp for å rigge telt, skjermar, barar og lokale.

Blant dei som bidrog, var dei nystarta gründerane i Glimt Event AS.

Ivar Bøthun, Tommy Aasen og Torbjørn Hjelle hadde nyleg investert i 30 kvadratmeter med fleksible LED-skjermar. Etter debut under kongebesøket i Samnanger fekk dei førespurnader frå fem ulike aktørar før kvartfinalen.

Likevel valde dei Vognhallen.

– Vi kunne leigd dei vekk og sleppt å ta rigginga, men det er kjekt å bidra i heimbygda, sa Ivar.

Les ògNystarta skjerm-firma debuterte under kongebesøk. I dag prioriterer dei heimebane.

For å få skjermane på plass måtte både fedrar, barn og barna sine kjærastar trø til.

Det nye firmaet fekk dermed vist fram utstyret sitt på heimebane, samtidig som dei var med på å gi hundrevis av bjørnafjordingar ein sommarkveld utanom det vanlege.

VM-eventyret enda tidlegare enn mange håpa, og diskusjonane om dommaravgjerdene gjekk høgt lenge etter sluttsignalet. Men juli viste òg noko anna; kva som skjer når frivillige, lokale bedrifter og eldsjeler dreg i same retning. Då blir ein fotballkamp til ein folkefest.

Folkefest blir det også dei komande dagane. Øyafest lover innhaldsrikt program frå torsdag av.

Bygger seg inn på bustadmarknaden

Dugnadsånda fann vi òg i Røtingavegen.

Der har dei tidlegare klassekameratane Kristoffer Bøe og Tobias Kjerland Midtun brukt fritida på å totalrenovere ein einebustad frå 1963.

Dei to 21-åringane kjøpte først ei leilegheit saman for å kome seg inn på bustadmarknaden. Etter sal med gevinst gjekk dei laus på eit langt større prosjekt.

Les ògKlassekameratane spleiste på ein leilegheit. Prosjekt nummer to blei «litt» større.

Då dei fekk nøklane ein fredag i mars, brukte dei helga på å rydde tomta med motorsag og gravemaskin. Måndagen blei den første salven skoten.

– Vi skjønte at det ville bli mykje jobb, så det var berre til å kome i gang, sa Kristoffer.

Ved sida av full jobb og teknisk fagskule har dei drenert, isolert, rive, bygd og planert. Fagfolk er leigde inn der det er nødvendig, medan fedrar, kameratar og kjærastar har bidrege med råd, arbeid og mat.

Målet er ikkje å bli buande lenge.

– Vi prøver å skape verdi, sånn at vi kan selje og tene nok til å kjøpe kvar sin bustad seinare.

Ein månad med skaparglede

Sommar kan vere rolege dagar og lågare tempo. Men for mange bjørnafjordingar har juli òg vore ein månad for å snekre, grave, rigge, samarbeide – og skape noko som varer litt lenger enn ferien.

Midtsiden vil følge både dei nye satsingane og menneska bak dei vidare.

Beste helsing

Marie Kroka

Journalist