Når 2000 skal heim - i 16 bilar

Under Osøren Blues & Jazzfestival i helga var det fleire som måtte venta lenge på drosje. No er det nok ei festivalhelg – her er tips til korleis du kjem deg heim.

Os Taxi kjører med alle sine 16 bilar i festivalhelgene, men seier kø ikkje er til å unngå når det er fleire tusen på fest. (Foto: Kjetil Vasby Bruarøy)
Kjetil Vasby Bruarøy
Kjetil Vasby Bruarøyonsdag 03. juli 2013 15:11

"No har eg venta i 3,5 time og framleis ingen taxi" skreiv ein Midtsiden-lesar i epost til redaksjonen, klokka 04.50 natt til søndag.

Innsendaren lurer på korleis Os Taxi rustar seg til festivalhelg, og om kapasiteten er god nok.

– Prioriterer dei som er utandørs

Styreformann i Os Taxi, Tor Anders Hauge, seier dei gjer sitt beste for å ta unna dei store folkemengdene når det er festival, men at dei uansett ikkje klarer å unngå venting.

– Vi har alle 16 bilane i drift heile natta. I tillegg hadde vi varsla Bergen Taxi og bedt dei med ledig kapasitet koma oppover til Os.

– Det kom også nokre bilar oppover, ein av dei kjørte i cirka tre timar på osingar.

– Men når det er rundt 4000 osingar på fest i løpet av helga, er volumet så stort at vi ikkje har sjanse til å unngå at nokon ventar.

Hauge forklarer at dei prioriterer dei som er utandørs - anten dei står på haldeplassen i Os sentrum eller bestiller frå eit festlokale eller liknande.

– Dei som sit heime eller på nachspiel har i det minste tak over hovudet.

Skal du frå nachspiel til nachspiel - eller heim, kan det vera greit å bestilla tidleg eller ordna seg med buss eller ein venn som kan henta deg.

Nytt hus, ny nettside, ny app

Os Taxi får i desse dagar ny drosjebu på Os terminal.

Les òg: Doblar drosjebua

– Vi overtar i morgon og flyttar inn i løpet av helga. Men allereie no kan dei som ventar ha glede av ekstra tak-utstikk om det kjem regn.

Os Taxi har også fått ei ny heimeside som skal lanserast måndag, ostaxi.no.

– Sida er allereie i drift og fungerer til bestillingar. Der er også ein app som folk kan lasta ned for endå enklare drosjebestilling, seier Tor Anders.

Drosje og buss frå Søfteland

Fredag og laurdag er det rockefestival på Sanden på Søfteland. Då er det venta like mange folk ute som førre helg.

– Så snart det byrjar å koma bestillingar frå Søfteland natt til laurdag og søndag, så etablerer vi ein liten haldeplass der, truleg ved skulen, sidan det er så mange fotgjengarar frå Sanden og opp likevel.

Om køen blir lang og du berre skal til Os eller mot Bergen, kan det samtidig vera verdt å merka seg bussrutene i begge retningar, sjå skyss.no og rutetidene ramsa opp under.

– I tillegg har vi i samarbeid med Osbuss sett opp ekstrabussar til Bergen sentrum klokka 01.30 og 02.00 frå Søfteland skule, både natt til laurdag og natt til søndag, seier festivalsjef Andreas Lindborg.

Skyss sine rutebussar, avgangar rundt midnatt

Frå Søfteland skule til Bergen sentrum fredag/natt til laurdag: kl 22.55, 00.20 og 01.45.
Frå Søfteland skule til Bergen sentrum laurdag/natt til søndag: kl 22.55, 00.20 og 01.45.

Frå Søfteland skule til Os sentrum fredag/natt til laurdag: 23.20, 00.50, 02.10, 03.25 og 03.55.
Frå Søfteland skule til Os sentrum laurdag/natt til søndag: 22.25, 23.25, 00.55, 02.10, 03.25 og 03.55.

Spennande? Vil du ha ukas høgdepunkt i innboksen?

Bli medlem du også!

Di støtte gir liv til lokalavisa vår.

  • Tilgang til alt innhald
  • Utan bindingstid
  • Sommartilbod frå 5 kr
Få sommartilbodet

Abonnementet blir fornya kvar måned. Du kan seia opp kor tid du vil, og blir då ikkje belasta for neste periode.