Når du ikkje passar inn

– Den førre boka handla litt om ikkje å få sova om natta. Gongen før var det litt om det å vera ukomfortabel på stranda, seier barnebokforfattaren og kunstnaren Vidar Bratlund Mæland.

Fire år etter debuten kom han denne veka med si fjerde bok om Kald Kaffi Sauen, figuren som er årsaka til at kaffien din av og til blir kald.

Denne gong er han med far i huset til slottet, då far har laga ein skulptur for kongefamilien. Sauen finn som vanleg på ugagn.

– Har du sjølv erfaring med kongefamilien?

– Nei, eg har ikkje det. Men far (kunstnar Arne Mæland, red anm) har fått skulpturar avduka av både kongen, dronninga og kronprinsparet.

– Men kongefamilien og slottsbesøket er berre ei ramme på forteljinga, boka handlar om å vera i eit selskap der du absolutt ikkje passar inn, og om å takla episodar som då kan oppstå.

1000 av kvar

Mæland har førebels ikkje brukt ressursar på å prøva å få bøkene sine inn i innkjøpsordninga, han har i staden satsa på sal hos lokale bokhandlarar og ein del frittståande bokhandlarar.

– Eg har trykt 1000 av kvar og bøkene sel jamt og godt, også dei første eg kom med.

– Og så har boka blitt tatt inn i stadig fleire nettbokhandlarar.

Mæland har også faste lesarar av Kald Kaffi Sauen på Austlandet, i Sverige og i Nord-Noreg, som han sender bøker til.

Når fleire aldersgrupper

Morosame illustrasjonar saman med tekst på nynorsk følgjer Kald Kaffi Sauen, som tydelegvis ikkje berre treff dei i hovudmålgruppa, ungar frå 3 til 8 år.

– Eg får av og til hyggelege tilbakemeldingar på epost. Og bestillingar.

– Blant dei ferskaste er nokre som ville ha eit fullt sett til ein som fyller 50 år. Dei meinte bøkene passa han godt, ler Vidar.