Tor Egil Hylland under årets Osfest. (Foto: Kjetil Vasby Bruarøy)
Tor Egil Hylland under årets Osfest. (Foto: Kjetil Vasby Bruarøy)

Neste festival blir utanfor Os

– Vi ønskjer å koma styrka tilbake til heimbygda når vi finn eigna område, seier Hylland frå Osfest.

Kjetil Vasby Bruarøy
17. desember 2019 - 18:15

Om knappe to veker står Osfest-arrangørane Os Live AS bak «Lille Nyttårsaften»-arrangementet på Nore Neset. I fjor blei det ny rekord, over 600 kom for å høyra Untouchabl(u)es, Gunslingers og Vetrhus Bluesband.

I år står Vivillain, Bighorn Butterboys og Kim Larsen-tributebandet This Was My Life på plakaten.

– Det ser ut som om interessa er like stor i år. Vivillain og Bighorn Butterboys er to knallgode liveband, This Was My Life blei tatt veldig godt imot på Osfest i år, og hadde tidlegare i desember to utselte konsertar i Bergen, seier festivalsjef Tor Egil Hylland.

Men kva med Osfest 2020?

Grusbanen som forsvinn

Første Osfest blei arrangert på grusbanen ved Os ungdomsskule i august 2014. Der blei dei verande, men i 2020 skal banen fjernast til fordel for parkeringshus med kunstgrasbane på taket.

Dermed måtte Osfest-arrangørane sjå etter nytt område.

• Les òg: Osfest er ved eit vegskilje (august 2019)

– Vi hadde den asfalterte plassen mellom Os ungdomsskule og Os Aktiv, som er under bygging, øvst på ønskjelista. Der har vi òg vore på synfaring med kultureininga i Os kommune.

Men også her skal det koma fleire oppgraderingar, og partane blei einige om å venta til dette arbeidet er ferdig for å sjå på moglegheitene på nytt.

– Område som Ulven, Mobergsvikjo og Kuventræ er vurdert. Vi blei jo invitert til Kuventræ i 2016, men så var det fleire som meinte at det var for usentralt. Mobergsvikjo er teknisk urealistisk å rigga for festival av ein viss dimensjon og Ulven er endå meir usentralt enn Kuventræ igjen.

– Vi meiner Osfest bør ligga nær sentrum og gjestehamna, og set Os på pause.

Har funne nytt område utanfor Os

Sjølv om det ikkje blir Osfest i Os neste år, jobbar Os Live intenst med å arrangera musikkfestival sommaren 2020.

– Vi har gjort avtale på område og vi har reservert fleire band, fortel Hylland.

– Men fram til vi har løyve på plass, og nokre fleire sponsorar, vil vi ikkje fortelja kvar det er.

Namn på festivalen er heller ikkje bestemt.

– Vi håper å koma i mål så den blir arrangert sommaren 2020, viss ikkje blir det i 2021. Går det bra med ny festival vil vi halda fram med denne samtidig som vi kjem betre rusta tilbake til Os for å laga Osfest om nokre år.

Les meir om

Kultur Festivalar Osfest