Nesten i mål
Sjølv om det gjenstår litt arbeid har nybygget på Kuventræ skule blitt tatt i bruk frå skulestart.
Bildeserie:
Når elevane ved Kuventræ skule møtte opp første skuledag hadde skulen deira fått eit heilt nytt bygg i løpet av sommaren.
– Dei tilsette måtte venta til sundagen før skulestart for å få setta på plass tinga sine, så då blei det full arbeidsinnsats til seint på kveld, fortel rektor Olav Røttingen.
Frå desember 2013 då kommunestyret fatta vedtak om å bygga på skulen for å ta hand om elev-veksten 2014, til bygget byrja å reisast rundt påsketider, stod bygget no klart til å ta imot elevane.
Småting gjenstår
Heilt klart er det ikkje, men veka før skulestart skreiv byggesaksavdelinga ut midlertidig bruksløyve for bygget.
– Det gjenstår litt småting, blant anna med det tekniske, i tillegg er ikkje 2. etasje ferdig endå. Men i neste veke skal alt vera oppe og gå, seier Røttingen nøgd.
Den nye delen av bygget skildrar han som lys og moderne og etter dagens standard.
– I 2. etasje vil vi få eit fleirbruksrom i tillegg til eit datarom, og vi kan gå tørrskodd mellom biblioteket i gamledelen og fleirbruksrommet i nyedelen.
Skulen har i tillegg til fleirbruksrom og datarom fått toalett, heis og fire nye klasserom, alle med grupperom og garderobar.
Gode rom til alle
Før utvidinga måtte to av klassane ved skulen bruka rom som er dårleg eigna, og Røttingen er glad det no er gode rom med god plass til alle dei rekordmange 299 elevane.
– Eg håper at når resten av skulen ein gong i framtida skal oppgraderast, at det blir i same stil som nybygget, seier Røttingen, som no gler seg til å få "shina" opp både inne og ute etter byggearbeidet.