Neverdal vil selja

– No kan andre få nyta denne flotte eigedomen, seier Eirik Neverdal, som har annonsert huset sitt for sal for 18 millionar kroner.

Solstrandvegen 40 er no for sal. (Meklarbilde: Hugo Førde, DNB Residens)
Kjetil Vasby Bruarøy
Kjetil Vasby Bruarøyfredag 08. juni 2012 15:38

Solstrandvegen 40 kom torsdag ettermiddag for sal. Den 16 år gamle villaen på Hauge er på rundt 600 kvadratmeter og bustaden er blant dei mest eksklusive som har vore for sal i Os.

– Ungane har blitt vaksne og derfor er det berre Lisbeth og eg som no blir buande her i dette vakre og store huset, seier Eirik Neverdal.

– Det er ein fantastisk eigedom som heller bør nytast av fleire, og gjerne ein aktiv familie med ungar som kan få den same gleda ut av denne eigedomen som vi har hatt gjennom 16 år.

Lisbeth og eg tenkjer oss no eit liv som pensjonistar i sol og varme på sørlege breiddegradar om vinteren og eit herleg liv minst seks månadar i året i huset vårt ved sjøen på Sørstrøno.

Neverdal, som er lokalpolitikar for TvS, legg ikkje skjul på at han no er i sin siste periode i politikken. Men han vil ikkje flytta frå Os.

– Nei, vi vil ha bustadadresse her. Så blir det nokre månadar i varmen om vinteren og lange, fine somrar på Strøno i åra som kjem.

– Det var lyset som lokka

Neverdal er vaksen opp i Bergen, men budde på Nesøya i Asker før han og familien flytta til Os.

– Det var i tida eg dreiv Fjellstrand at eg ofte kjørte gjennom Os og Fusa på veg til Omastrand. Å koma tilbake til Os frå Hardanger, gjerne i regnvêr, og oppleva lettare vêr og det spesielle lyset som ofte er i Os, gjorde at eg sa "her skal eg ein gong busetja meg".

Så selte Neverdal verftet sitt til Kværner og jobba i etterkant i Oslo for konsernleiinga i Kværner. Men då ungane nærma seg skulealder merka han og kona Lisbeth at det var på tide å bestemma seg for kvar ungane skulle gå på skule og veksa opp.

– Tomtene på Hauge kjøpte eg på 80-talet. I 96' fekk vi huset bygd, medan vi framleis budde i Oslo, fortel han.

– Os finast i Hordaland

Solstrandvegen er bygd i svært høg standard, med biljardrom, trimrom, badstove og vinkjellar. Kvart soverom har eige bad og eigen garderobe.

Neverdal er veldig nøgd med huset, men han er også svært nøgd med både Strøno og Os som kommune å bu i.

– Veksten i Os kjem til å bli større en vi klarer å sjå for oss. Os må vera det mest fantastiske området i fylket, Når ny veg mellom Bergen og Os er på plass kjem det til å eksplodera i eigedomsmarknaden, trur han.

– Sjølv er vi nøgd med å trekka oss tilbake på Strøno. Der har vi over 200 kvadratmeter og allereie då vi bygde for 10 år sidan så planla vi med livsløpsstandard både innandørs og utandørs. Det er til og med trappefritt ned til kaien.

– Kva med responsen på eigedomen? Det er vel eit stykke mellom dei som har råd til ein eigedom i denne prisklassen?

– Det tar vi som det kjem, vi har god tid, seier 63-åringen, som no har trappa ned og driv med investering og konsulentoppdrag, men i mindre skala.

– Men vi håper det kjem ein familie med ungar og overtar eigedomen, for det er ein flott plass å bu, forsikrar han.

Spennande? Vil du ha ukas høgdepunkt i innboksen?

Bli medlem du også!

Di støtte gir liv til lokalavisa vår.

  • Tilgang til alt innhald
  • Utan bindingstid
  • Sommartilbod frå 5 kr
Få sommartilbodet

Abonnementet blir fornya kvar måned. Du kan seia opp kor tid du vil, og blir då ikkje belasta for neste periode.