Ni gasellebedrifter frå Os

Dagens Næringsliv har kåra gasellebedrifter sidan 2003. Gaselleedrifter må blant anna ha dobla omsetnaden i løpet av fire år, og hatt vekst kvart år.

Av årets drygt 3200 gasellebedrifter i Noreg er det skaffa 47.700 nye arbeidsplassar, gasellebedriftene skaper meir enn dobbelt så mange nye jobbar enn andre i privat sektor.

Årets gasellekonferanse i Hordaland, med ein serie foredrag, blei arrangert på Quality Hotel Edvard Grieg torsdag ettermiddag. Av 226 gaseller i Hordaland blei Eide Fjordbruk AS frå Fusa gasellevinnar.

Selskapet, som er ei av to gaseller frå Fusa, har vakse frå 94,5 til 881,7 millionar kroner i omsetnad frå 2014 til 2017. Den andre gasella i Fusa er Stian Bakken AS.

Vekst innan sport og hage

I Os er det i år 9 gaseller, basert på tal frå 2014 til 2017.

• Topp 100: Desse selskapa frå Os vaks mest i 2017

3 av 9 driv innan sport, 3 andre av 9 driv innan «utandørs», relatert til hage (brøyting, landskapsarkitektur og hageplanlegging med utføring).

Her er 2018-gasellene frå Os:

4. Elements Production AS
2014: 12 mill
2015: 61,5 mill
2016: 101 mill
2017: 239,4 mill

12. Vest Brøyteutstyr AS
2014: 1,3 mill
2015: 4,4 mill
2016: 8,1 mill
2017: 9,3 mill

18. Os Bygg AS
2014: 1,7 mill
2015: 2,1 mill
2016: 6,4 mill
2017: 10,1 mill

26. Sport Outlet AS
2014: 14,7 mill
2015: 23,1 mill
2016: 25,6 mill
2017: 215,4 mill

127. Stadion Sport Bergen AS
2014: 8,6 mill
2015: 9,9 mill
2016: 17,3 mill
2017: 22,4 mill

133. Picapoint Studio AS
2014: 5,9 mill
2015: 6,1 mill
2016: 7,7 mill
2017: 14,7 mill

187. Fanagro AS
2014: 1,2 mill
2015: 1,8 mill
2016: 2,3 mill
2017: 3,1 mill

212. Os Hageservice AS
2014: 5 mill
2015: 6,2 mill
2016: 8 mill
2017: 10,4 mill

215. Asia Mat Os AS
2014: 1,9 mill
2015: 3,8 mill
2016: 4,1 mill
2017: 4,2 mill

– Folk vil ha det ferdig utandørs

Os Hageservice er gasellebedrift for andre gong. Gründer Tore Færevaag fortel om jamn vekst og få «gaselle-sprett».

– I hovudsak rettar vi oss mot privatmarknaden, og dei fleste oppdraga våre er små. Men det har auka år for år, både i mengda og i storleik.

– Folk stussar ikkje på å bruka 500.000 kroner på bad og kjøkken, men har gjerne ambisjonar om å gjera det meste i hagen sjølv. Etterkvart ønskjer dei å få hagen ferdig, og sjølv om dei fleste oppdraga våre er på under 100.000 kroner, er det no fleire som vil at vi skal ta heile eller store delar av hagen.

Eit viktig verktøy her er 3D-teikning og video. Os Hageservice har designprogram der dei effektivt kan henta inn flyfoto av tomta, og saman med kunden planlegga og visa korleis ferdig resultat vil bli.

Selskapet har 14 tilsette, nokre av dei i sesong, så total mengde årsverk blir rundt 10.

– Veksta har halde fram også i 2018, og eg trur vi kjem til å auka litt til i åra som kjem.