Ni medaljar i nordisk

Seks deltakarar frå Os Håndbak Klubb tok til saman ni medaljar i nordisk meisterskap i helga.

Kjetil Vasby Bruarøysøndag 25. okt. 2009 06:47

- Det var eit bra arrangement med mange deltakarar. Svenskane tok det meste av medaljar, men vi er nøgde med å koma på pallen i om lag alle klassane vi deltok i, seier Tore Matre på vegne av seg sjølv og dei fem andre deltakarane frå Os.

Årets nordiske meisterskap i handbak blei arrangert i den svenske byen Eskilstuna. Osingane reiser sundag heim med 1 gull, 5 sølv, 3 bronse og fleire 4. og 5. plassar.

Nesten på pallen
Martin Bolseth deltok i både junior og senior. I +80 kg for junior fekk han 4. plass i høgre arm.

Asle Kvamsdal deltok i -90 kg senior, der han tok ein fin 5. plass i venstre.

4 sølv til Hanne Lise
Hanne Lise Kvamsdal var einaste jente i reisefølgjet frå Os.

Ho fekk ikkje så mange å kjempa mot i -50 kilosklassen, så med nokre sigrar kunne ho ta med seg heile 4 sølvmedaljar heim (venstre og høgre, junior og senior)

Nær gullet
Ronny Bruarøy Risøen har gått opp nokre vektklassar, men det hindra han ikkje frå å ta medalje. I senior -110 kg vann han bronse med både høgre og venstre arm.

Tore Matre stilte i -90 kg senior, den same klassen som Kvamsdal fekk 5. plass i. Tore har vore skadd i høgrearmen i lang tid, derfor var han overraska over at han klarte 4. plass med den armen. I klassen for venstre gjekk det endå betre.

- Det blei sølv. Litt irriterande å vera så nær gull, men eg er sjølvsagt nøgd med andreplassen, seier Tore.

Forsvarte tittelen
Frode Veim Haugland, som tok gull i 2008, er framleis i form. I senior -80 kg blei det bronse med venstre arm, i klassen for høgre forsvarte han tittelen.

- Han fekk ein tøff finale, men glimta til med nok eit gull, fortel Matre.

Elvestad var med
I september skreiv vi om Henrik Elvestad frå Golden Goal på TV 2, som ville ha coaching av handbakveteranen Arne Thuen under stemnet, som innslag i det populære fredagsprogrammet.

- Eg skadde meg i hofta tidlegare denne veka, og fekk dessverre ikkje vera med, seier Arne Thuen til Midtsiden.no.

Frode Veim Haugland steppa inn, og hadde med seg Elvestad laurdag formiddag.

- Det var morosamt, seier Frode, om innspelinga til det som skal koma på skjermen i desember.

- Elvestad er ein morosam og hyggeleg fyr. Det verka som om han har sans for sporten vår, men eg trur ikkje han er bygd for akkurat dette, seier Tore Matre.