NM-gull til Frode og Tore

Os Håndbakklubb tok 8 medaljar i NM i Skien i helga, men er for første gong sidan 2004 ikkje Noregs beste klubb.

Bak f.v.: Frode Veim Haugland, Tore Matre, Øyvind Birkeland, Arne Thuen, Kjell Robert Stokka, Øystein Brakstad, framme f.v.: Aleksander Kleppe, Rune K. Bårøy, Erlend Hjertholm, Mikal Stokka, Anders Kolle og Robert Gravdal (Foto: Renate Flatland)
Kjetil Vasby Bruarøy
Kjetil Vasby Bruarøysøndag 13. apr. 2014 22:49

Frode Veim Haugland og Tore Matre vann gull med kvar sin arm i -95 kg i NM i handbak i Skien i helga.

– Det var ein lang og tøff finale, og mitt første NM-gull sidan 2010, så det smakte ekstra godt, seier Tore, som vann med høgre arm.

Frode var skadd i høgre arm etter Arm Wars tidlegare i april, men vann med venstre, også han etter ein hard finale.

Fleire medaljar til Os, Fusa og Stord

Robert Gravdal frå Stord tok, som einaste frå Os Håndbakklubb, gull med både høgre og venstre arm. I tillegg vann han open klasse, trass i at han deltar i -75 kg.

Øyvind Birkeland frå Stord vann -105 kg med høgre arm.

Erlend Hjertholm frå Os vann to bronsemedaljar i junbior + 80 kg, Anders Kolle frå Fusa fekk sølv i -80 kg junior (venstre arm).

3. beste klubb

Medan Asle Kvamsdal (som blei kåra til årets utøvar i 2013) frå Masfjorden no deltar for Masfjorden, er stordingane og fusingane framleis representantar for Os.

Det var likevel ikkje nok til at Os, etter å ha vore beste klubb i NM 9 år på rad, også i år blei beste klubb. Os kom på 3. plass, to poeng bak 2. plassen, 12 poeng bak 1. plass.

– Når Frode berre deltar med éin arm, Arne Thuen har stang ut og Are Strønen og Ronny B. Risøen ikkje var med, blei det dessverre litt knapt, seier Matre.

Står over EM og VM

I midten av mai er det EM i Aserbajdsjan.

– Der trur eg berre det er Øyvind og Robert som deltar. Sjølv ventar eg til eg er frisk i høgre arm, seier Frode.

– Kanskje eg blir bra til juni, då er det ein stemne i Las Vegas eg vurderer å delta i.

Også VM kan ryka for Frode, som ikkje har fri frå jobb under verdsmeisterskapen i Litauen i september.

– Det blir truleg Arm Wars og ikkje VM på meg til hausten, seier noregsmeisteren.

Spennande? Vil du ha ukas høgdepunkt i innboksen?

Les meir om

Bli medlem du også!

Di støtte gir liv til lokalavisa vår.

  • Tilgang til alt innhald
  • Utan bindingstid
  • Sommartilbod frå 5 kr
Få sommartilbodet

Abonnementet blir fornya kvar måned. Du kan seia opp kor tid du vil, og blir då ikkje belasta for neste periode.