NM-sølv til Madelen

Bildeserie:

1 av 1

Madelen Koldal Holme (16) skåra sitt første mål for Sandviken med tunell på keeper 11 minutt etter at ho kom på banen i NM-runde mot Åsane i mai.

I går sat ho på tribunen då Sandviken, som kom på 4. plass i serien, spelte cupfinale mot serievinnar LSK Kvinner i Telenor Arena. Finalen enda 0-4.

– Sjølv om vi tapte var det både gøy og inspirerande å sjå kampen! Lillestrøm er gode, og har nokre heilt spesielt raske spelarar, seier Madelen.

16-åringen deltok òg på banketten på Hotel Bristol, og reiser heim frå Oslo med sin eigen sølvpokal i bagasjen. Å delta i éin NM-kamp er nok, så skåringa var ikkje avgjerande.

– Banketten var veldig staseleg, med fine talar og mange hyggelege møte. To av dei som sat på benken for Lillestrøm i dag er landslagskollegaer av meg på J16. Ei av dei som var i startellevaren har vore gjennom same operasjon som meg.

Ligg framfor skjema

Det var i september Madelen rauk korsbandet i ei takling i kamp mellom Sandviken 2 og Fyllingsdalen.

Madelen fekk i år 2 kampar og 1 mål for A-laget, og skåra 4 mål på 6 kampar for Sandviken 2 før ho blei sett ut av drift.

– Eg kasta krykkene to veker etter operasjonen, og eg har fått beskjed om at restitusjonen går så bra som det kan gå. Eg ligg framfor skjema.

Fotballtalentet frå Lysefjorden trener no fleire timar enn ho gjorde då ho var frisk, men har førebels ikkje lov å løpa.

– Men eg får køyrd bra tempo på elipsemaskin!

– Eg har fått beskjed om at eg kan løpa igjen i veke 12, men vi tar veke for veke, så vi får sjå.

Finn inspirasjon frå fleire idrettar

Madelen seier ho sjølvsagt skulle ønskt at ho kunne fått speletid i cupfinalen. Før ho blei skadd skal ho ha fått signal om at det kunne bli meir speletid i løpet av hausten.

Mens ho trener seg opp igjen frå skaden finn ho inspirasjon frå ulike idrettsutøvarar.

– Både Zlatan og utøvarar frå andre idrettar, som snowboard og utfor, seier mykje bra om det å trena seg opp igjen, og å koma tilbake. Aksel Lund Svindal er ein av dei. Eg henter mykje motivasjon frå YouTube mellom treningsøktene, seier Madelen.