No er alle over 18 år inviterte til vaksinasjon

Oversikta over sommarvaksineringa kom i slutten av juni, i førre veke starta vaksineringa etter det nye timebestillingssystemet.

Førre veke (veke 27) og denne kjem det noko færre dosar enn i juni.

Les ògVaksinemengda for sommaren har kome

– Vi fekk 760 dosar i førre veke, så vi tok alt på éin dag.

– Det gjer vi i morgon også, men i neste veke blir det vaksinasjon både onsdag og fredag, seier vaksinekoordinator Nina Oen.

Fulle lister dei neste vekene

I det nye systemet kan innbyggarane bestilla time fram til 20. august.

– Vi er glade for at ikkje det har vore vanskeleg å fylla setene. At det var få dosar i førre og denne veka, har nok hjelpt på.

Les ògNytt system: Sånn har vaksineresponsen vore på gruppe 10

– Enkelte har også ringt vaksinetelefonen og sagt at dei er skuffa over ikkje å få time tidlegare.

Det er fullt både denne veka og neste. Men det kan vera håp om framskynding for enkelte.

– Vi har fått minst like mykje som det vi har blitt lova, og det er mogleg at vi får inn nokre ekstra hetteglas.

– I så fall legg vi ut fleire ledige timar, så dei som er ivrige etter å få tidleg dose kan følgja ekstra godt med.

Manglar telefonnummer på enkelte

Kommunen reknar no med at alle i gruppe 10 (18-24 år saman med 40-44 år) no har fått bestilt seg time.

– Fredag sendte vi ut sms til gruppe 11, alle frå 25 til 39 år, med invitasjon til å bestilla time.

Det betyr at alle over 18 år no skal ha fått tilbod om vaksine.

– Men det er enkelte vi ikkje har telefonnummer til i listene våre, så dei som ikkje har fått sms kan ringa vaksinetelefonen og registrera seg.