Etter lansering i januar 2013 har Carl-Erik Michalsen Moberg (bildet) og Kåre Michael Bottolfsen sitt TicketCo vunne fleire prisar. No skal dei veksa endå fortare. (Foto: TicketCo)

No er TicketCo verdsett til 270 millionar

– Det er ikkje tal eg forholder meg til, seier osingen Carl-Erik M. Moberg, ein av dei tre gründerane bak billettsuksessen.

Av: Kjetil Vasby Bruarøy

I 2012 var Carl-Erik Michalsen Moberg ein av tre grunnleggarar av selskapet, i dag er han saman med Kåre Michael Bottolfsen ein av dei fire største eigarane av selskapet.

«Bottolfsen og Moberg så et hull i markedet i 2013. Nå har de aksjer for 51 og 38 millioner» skreiv Finansavisen på forsida tysdag.

Omtalen var i samband med at selskapet veks i rakettfart, og gründerane no er ute og hentar 90 millionar i ein emisjon for veksa endå fortare.

– Selskapet sin verdi er sett, kva aksjane på papiret er verdt er ikkje noko eg går rundt og tenkjer på. Vi har fokus på å levera eit produkt som fungerer og på å skapa gode arbeidsplassar, seier salssjef Moberg til Midtsiden.

– Systemet er saumlaust og har stor kapasitet. Emisjonen utfører vi først og fremst for å få fleire seljarar på plass. Det er travelt, og det blir mykje reising, men å reisa rundt og møta mange hyggelege folk er berre gøy.

Pris etter pris

Moberg og Bottolfsen skapte TicketCo då dei sjølv skulle arrangera ein festival, og ikkje fann andre løysingar som godt eigna. 

I 2013 blei Osøren Blues & Jazzfestival blant dei første kundane, i 2015 vann dei Rising Star-prisen og i 2016 var selskapet norsk vinnar av The European Business Awards (videoreportasje).

Amedia og Friele er frå før blant investorane i selskapet.

England og Eliteserien

Tenesta blei lansert i januar 2013, no har dei ekspandert til Storbritannia, Sverige og Polen.

– Nett no vekst vi raskast i Storbritannia. Britane er sosiale, og møtest gjerne ute i staden for å siga ned i sofaen slik vi nordmenn har ein tendens til å gjera. Kundane våre har tett med arrangement, den største sel 15.000 til 20.000 billettar i veka.

På heimebane har TicketCo nyleg sikra seg kontrakt på både OBOS-ligaen og Eliteserien, fleire av klubbane har allereie tatt tenesta i bruk.

Duka for auka overskot

I fjor omsette TicketCo for 27 millionar. TicketCo Norge sto for 23,3 millionar og hadde eit driftsresultat på 3,6 millionar.

– I år landar vi på mellom 33 og 35 millionar i omsetnad, seier Moberg.

Selskapet reknar med å auka overskotet med 50-60 prosent i år.

I 2020 får TicketCo betalingsforetakskonsesjon. Då skal selskapet for alvor gi gass.

– Billettmarknaden i Europa er stor, inntektspotensialet er på 70 milliardar kroner, seier Bottolfsen til Finansavisen.

Fleire saker