No kan det bli koding!

I februar 2016 stilte Helge Steinum (AP) spørsmål om Os kommune ville søkje om å vera med i forsøksprosjektet til regjeringa med koding som valfag i ungdomsskulene.

Formannskapet og rådmann Christian F. Fotland var umiddelbart positive og rådmannen sendte avgarde søknaden.

I juni kom svaret om at Os ikkje fekk vera med i forsøket, og heller ikkje dekke det sjølv.

Seier ja til koding

På BT.no kjem det fram at kunnskapsminister Torbjørn Rød Isaksen (H) no opnar for koding som valfag hos alle ungdomsskular i landet i forsøksperioden som strekk seg fram til skuleåret 2018/19.

– Programmering blir ein stadig viktigare ferdigheit, og vi legg no til rette for at enno fleire kan læra å kode allereie på ungdomsskulen, seier kunnskapsministeren.

Skuler som ønskjer det, kan tilby valfaget allereie frå hausten 2017, men dei vil ikkje vera ein del av sjølve forsøket eller få økonomisk støtte til faget frå staten.

– Vi har kompetansen og er klare

Rådmann Christian F. Fotland blir særs glad når Midtsiden ringjer for å få ein kommentar.

– Dette er fantastisk gode nyhende. Vi har kompetansen, kapasiteten og lyst. Eg trur dette er framtida.

– Vi starter arbeidet med ein gong for å sjå om vi finn rom for dette frå hausten av på begge ungdomsskulane våre, lover Fotland.