No kan du låna deg entré på Kuventræ

I dag leverte dagleg leiar i Os Turn, Marita Haugland, lånbare partout-kort til biblioteksjef Kirstine Folmann.

– Det kom ein kar innom klubbhuset, tidlegare dommarsjef i Os Fotball Eivind Fauske, og fortalte at enkelte andre klubbar har tilsvarande tilbod, fortel Haugland.

Å låna tilgang på biblioteket til kampar på Kuventræ.

Ho drøfta det med leiinga av både fotball og handball, Endre Brenne og Christian Bugge, som var einige i at dette var ein fin idé.

– No er siste heimekamp for handballen spelt, men dei går i gang med dette til hausten.

Fotballsesongen er så vidt i gang, damelaget hadde serieopning heime søndag. Herrelaget har første heimekamp laurdag 13. april.

– Vi har godt publikum både på dame- og herrekampane, mange av dei med partoutkort, som gir veldig god rabatt.

– Frå før har vi fri entré for ungar. Med partoutkort til låns opnar vi for at dei som liker å låna på biblioteket òg kan låna seg tilgang til sporty, lokal underhaldning.

Marita kontakta biblioteket i går, men då var sjefen ute.

– Eg svingte innom i dag, og då var Kirstine Folmann både orientert og positivt innstilt til å ha fotballbillettar i sortimentet.

Tre inngangskort er leverte.

– Dei kan du låna i ei veke om gangen. Sjekkar du terminlistene kan du av og til få med deg fleire kampar, av både damer og herrar, før du leverer kortet inn igjen.