Nokon som saknar eit panser til ein Saab?

Bildeserie:

1 av 4

I februar signerte Os Rotary ei avtale med Os kommune om å kartleggja strandsona i Os for marint avfall og plast frå Solbjørg til Drange. Alle fuglereservata vart dessutan rydda samstundes med kartlegginga.

I perioden frå måndag 29. april til søndag 5. mai vart det gjennomført ein landsomfattande ryddeaksjon langs Norskekysten. Alle frivillige, skular, barnehagar, lag og organisasjonar var inviterte til å delta.

No reiser medlemmer frå Os Rotary rundt i skjergarden og hentar inn avfallet.

– Det ser betre ut i år

På Halhjem ferjekai står Os kommune klare med lastebil for å ta lasset vidare til Bir sitt anlegg i Kolskogen.

– Dette er andre turen vi tek i dag, fortel Hans Anton Kleiven frå Os Rotary.

Sjølv om båten er stappande full fortel Kleiven at det er mindre mengder avfall og plast i år.

– Dette er sjølvsagt positivt, men det er framleis store mengder det er snakk om, så jobben er langt frå ferdig i år.

Ispor-kassar, treverk, plast og litt av ein bil

Saman med Kleiven på dagens økt er Leo Corneliussen og Øystein Moberg.

Dei fortel at det er samla inn mykje «gjengangarar» som isopor-kassar, trevirke og plast, men på dette lasset har det òg dukka opp to heller overraskande objekt;

– Om det er nokon i Strøno som saknar eit panser til ein Saab 99 GL, har vi funne det.

I samme lasset låg det òg med eit bildekk på felg, så har du ein panser-laus Saab på tre hjul må du raska deg opp til Bir i Kolskogen.